Aizawl, the 7^th March, 2024: Vawiin khan Mizoram Football Association leh Women and Child Development, Govt. of Mizoram tangkawp chuan Police Headquarters Multipurpose Hall, Khatla-ah 'State Level Workshop on Sports and Gender - Challenges and Way Forward' an buatsaih. He hun hi Sports and Youth Services Minister Pu Lalnghinglova Hmar chuan khuallian niin a hawng.

He hunah hian Minister Pu Lalnghinglova Hmar chuan United Nations Sustainable Development Goal 5-na chu gender equality (mipa leh hmeichhe intluktlanna) a ni tih sawiin, sawrkarin hmeichhe hamthatna a ngaih pawimawh thu a sawi a, kumin 2024-25 budget-ah pawh gender budgeting a tel thu a sawi bawk a ni. Mizo hmeichhe infiammite tan a hmanrua leh hmunhmate (facility) a that tawk loh thu leh sawrkarin a theih ang ang a tihhmasawn a tum thu sawiin, Mizoram Football Association pawhin hmeichhe tana football league leh inelna dang tam thei ang ber buatsaih a tum thu a sawi bawk. Mizo hmeichhe tam zawkin eizawnna atana sports an hman theih nan tuna khel mekte chu sulsutu ni turin a fuih a, workshop session hmang tangkaiin harsatna sawi bakah hmasawn dan tur sawi hnem turin a chah bawk.

Sports & Gender Workshop-ah hian MFA chuan India International football player Grace H Lalrampari, Cindy Remruatpuii Colney, C. Ramthanpuii, Lalduhawmi, B Lalhriattiri, Offee Lalhmingchhuanpuii leh Gladys Zonunsangi te bakah National Referee pathum Level 5 ni phak - F. Zohmingliani, Lalhruaizeli Khiangte leh Lalthansangi te, Mizo hmeichhe zinga AFC 'C' Coaching License nei awmchhun R. Lalnunsangi te hnenah chawimawina a hlan.

Pi Zoramthangi Chhangte, Director, Women and Child Development chuan he hunah hian thu sawi bawkin, an department in an zirchianna atanga Mizoram a infiammite zingah hmeichhia an la beitham hle thu a sawi a, Football-ah hmeichhiate hmasawnna atan MFA nena thawh dun zel an inhuam thu a sawi bawk. Pi Flora Laltanpuii, Deputy Director, Women and Child Development pawhin infiammite fuihna thu leh India rama hmeichhiate hmasawnna tur kalphung tam tak a sawi bawk.

Vawiin workshop-ah hian MFA atangin Pu PC Vanlalhruaia, Sr. Vice President, Er. Lalnunzira, Pi Lalengvari, Pi Susan R. Ralte leh Pi Zonunthari te'n thu an sawi bawk a. District Football Association hrang hrang atangin hmeichhe football inkhelmi an kalkhawm a ni.

Attachment

Written by: Lalzara, MIS, IPRO