Dated Aizawl, 11^th June, 2024: Mizoram State Sports Council chuan vawiin tlai dar 4:30 khan MSSC Conference Hall, Hawla Indoor Stadium ah General Body Meeting an nei a. Mizoram Sports conclave 2024 sawihona leh thlir lawkna neih a ni. He hun hi Sports & Youths Services Department Minister leh MSSC President ni bawk Lalnghinglova Hmar chuan a telpui. 

Sports Minister Lalnghinglova Hmar chuan, Mizoram Sports Conclave inbuatsaihna Mizoram for Olympic Games, 2036 hi June ni 13-14, 2024 ah Baptist Centre, Falkland, Aizawl-a neih turin ruahman a ni a. Mizoram Sports Conclave hi National level sports intawhkhawmna niin, Olympics 2036 a Mizo infiammi tam thei ang berin Olympic medal an awrh theihna tura inbuatsaihna hmasa a ni. Mizoram-a National level Sports Conclave hmasa ber tur niin, India ram state zingah Mizoram hi Olympics 2036 Vision nei a National level Sports Conclave buatsaih hmasa ber kan ni, a ti. 

Sports minister chuan, Olympics 2036 thlen tumin India a inbuatsaih a. October 14, 2023-a International Olympic Committee (IOC) session-ah khatih laia Prime Minister Narendra Modi chuan India in Olympics 2036 thlen a tum thu hi a sawi, a ti a. India hi khawvela economy lian ber pakhat a ni tawh a, Olympics thleng thei khawpa tha sports infrastructure leh facility a siam thei dawn. Chutihrualin, Olympic level-a hlawhtling tur chuan infrastructure tha ringawt a tawk lo a, heng infrastructure leh facility tha tak taka inel tur infiammi tha kan neih tel a ngai. Chumi tur chuan tun atangin infiammite hmasawnna (athlete development) ngaihtuah a, hma lak nghal char char a tul tawh a ni, a ti bawk. 

MSSC President chuan, Ministry of Youth Affairs & Sports, Department of Sports chuan 'Mizoram Sports Conclave - Preparing Mizoram for Olympic Games, 2036' buatsaihna'n ni 27.02.2024 khan Scheme of Human Resources Development in Sports (HRDS) hnuaiah Rs. 68,80,500/- a sanction a ni, a ti.

North East State pathum heng Assam, Manipur leh Meghalaya Sports Minister te, SAI atangin Director General leh hotu dang te, Indian Olympic Association CEO, Ministry of Youth Affairs and Sports-a Secretary leh Services Sports Control Board (SSCB) Secretary te chu Sports Conclave-a tel thei ngei turin beisei an ni a. 

Tata Trusts, Reliance Foundation Sports, Tata Steel leh Inspire Institute of Sports-a an hotute'n kan sawmna pawmin an rawn tel thei dawn a. India ram chhung leh pawna prominent sportsperson leh journalist te, Olympic sports discipline a Indian Federation/Association hruaitu te, Mizo in Olympian kan neih C. Lalremsanga leh Lalremsiami te bakah Mizo infiammi hlawhtling dangte pawh an tel dawn a ni.

Sports Conclave hi Olympic Games-a medal kan hlawhchhuah theihna tura inbuatsaihna a nih angin, medal kan lak beiseiawm deuhna sports discipline te thlurbing a ni ang a. Conclave-ah hian infiammite hmasawnna ngaihpawimawh ber a ni ang a. Sawrkar, private sector, sports federation/association leh khawtlang anga mawhphurhna kan neih te zirho a, hmalak dan tur ruahmanna siam nghal zel tum a ni.

Infiammite hmasawna tura pawimawh dang, coaching, infrastructure leh facility tha zawk kan neih theih dan turte pawh ngaihpawimawh a ni ang a. Sports Conclave hi Olympic Games 2036 tinzawn chunga neih tur a ni a. Hemi huna rilru leh taksa vanglai hmang chho tur, tuna kum 8 leh 15 inkar te sports-a an hmasawnna tur ngaihpawimawh an ni ang.

Mizoram Sports Conclave hi kumdangah pawh neih chhunzawm zel tum a ni a. Mizoram Sports Conclave pual hian website mizoramsportsconclave.com siam a ni. Hemi kaltlang hian Conclave a tel turte in register theih a ni.

Mizoram Sports Conclave 2024 thlir lawknaah hian MSSC Secretary John Tanpuia, Vice President Dr. Lalhmuchhuaka leh Joint Secretary Zothanpuia ten telpuiin MSSC Members thahnem tak an tel bawk a ni.

Attachment