Hyderabad, the 8th of March, 2025: Ni hnih awh India rama Sports Minister te inkhawmpui, ‘Chintan Shivir of Ministers of Youth Affairs and Sports of States/UTs’ chu nimin leh vawiin khan Hyderabad-a Kanha Shanti Vanam ah neih a ni. He hunah hian Mizoram Sports & Youth Services Minister Pu Lalnghinglova Hmar chu telin session pahnih a kaihruai.
Ministry of Youth Affairs and Sports (YAS) buatsaih Sports Minister Conference hi Union Youth Affairs & Sports Minister Dr. Mansukh Mandaviya leh Minister of State Pi Raksha Nikhil Khadse te’n an kaihruai a. Session pasarih awmin, Mizoram Sports Minister Pu Lalnghinglova Hmar chu session pahnih, “Talent Search and Nurturing of Grass-root Talent” leh ‘Welfare of Sportspersons & Coaches and Sports Recruitment Policy’ ah te co-chair a ni.
Pu Lalnghinglova Hmar chuan kalkhawmte Chapchar Kut chibai a buk a. Mizoramah local cable TV te nen tangkawpin sports league kalpui thin a nih thu a tarlang. “Football, Basketball leh Volleyball ah te local media nen tangkawpin state league mumal tak kan kalpui a, mihring nuai 11 chauh ni chungin Indian National Football team hnuhnung berah Mizo player pali an tel thei. Sports hmasawnna’n media nena thawhhona tha neih hi a pawimawh tawlh tawlh dawn a ni” tiin, Mizoram model chu state dang tan pawh entawn tlaka tha a nih thu a sawi. Central sawrkarin “One Corporate sector - One sport discipline” kalpui a tum chu lawmawm a tih thu a sawi a, chutihrualin Mizoram ang state tê leh industry lian awm lohna te pawhin an hlawkpui lehzual turin ‘One Corporate sector - One state’ anga her rem a rawt.
Mizoram Sports Minister chuan sports thiamna chu skill pawimawh tak a ni tiin, Mizoram chuan Olympic 2036 vision nei chungin sports-a hmasawnna leh skill development kaihkawp a tum tih a tarlang. Tun atangin India infiammite thatna leh thiam zawng chhût a, Olympic medal la tam thei tur zawnga inherrem a tul tih a sawi. Mizoramin badminton-a hma a sawn mekah Conference-a tel ve Pullela Gopichand chungah lawmthu a sawi bawk.
India in Olympic 2036 thlen a tum a, International Olympic Committee-ah thlen dilna a thehlut tawh. Hei hian nasa takin India ram hruaitute hmathlir pawh a tidanglam a, Olympic lam hawiin India sports kalphung a inher mek. Sports Minister ‘Chintan Shivir’ pawh hi Los Angeles Olympic Games 2028 inbuatsaihna leh, India in 2036 Olympic Games thlen a tumna tichak tur hawi zawnga kalpui a ni. Sports kaihhnawih topic hrang hrangah India dinhmun leh hmasawn ngaihna lai te thlirho niin, Central leh state sawrkar thawhho dan tur inrawnkhawm a ni. Khelo India Scheme leh Khelo India School Games dinhmun leh hmasawn zel dan sawiho a ni a. Corporate te nen tangkawpa sports infrastructure changtlung din leh, infrastructure awmsa te tangkai zawka hman chungchang te, sports talent zawnchhuah leh tihhmasawn te, sports inrelbawlna (governance) tha leh rintlak nei tura hmalak te chu ngaihpawimawh zingah a tel.
Conference-ah hian athlete tha chherchhuak tura coaching tha a pawimawh thu te, selection process ‘fair’ leh langtlang nei tura hmalak te pawh ngaihtuah a ni a. Sportsperson leh coach te hamthatna chungchang te leh thalai kaihnawih (youth affairs) dang sawiho a ni bawk. Heng topic ah te hian State thlanchhuah aiawhte’n ‘Best practice’ presentation neiin, a duh apiang tan sawihona hun hawn zel a ni.
March ni 8, 2025 zingkarah International Women’s Day pualin ASMITA Cycle Rally buatsaih a ni bawk.
Conference ah hian India rama state 28 leh Union Territory 8 atangin Minister leh official thahnem tak an tel a. Anni bakah Ministry of Youth Affairs and Sports, Sports Authority of India leh National Sports Federation hruaitute leh sports expert thahnem tak an tel bawk. Pu Lalnghinglova Hmar hi Mizoram atangin Pu Mark Lalthanliana, Joint Secretary, Sports & Youth Services leh Pu H. Lalramenga, PS te’n an tawiawm a ni.
Attachment
