Aizawl the 9^th May, 2025: Nimin khan Mizoram Badminton Centre, Zuangtui a TATA Trusts, NEIDA, Pullela Gopichand Badminton Academy (PGBA), Mizoram State Sports Council (MSSC) leh Mizoram Badminton Association-te thawhhona atanga din, Regional Competitive Training Centre (RCTC) leh MBC Grassroot Centre chu Sports Minister Pu Lalnghinglova Hmar chuan Khuallian niin a hawng. He hunah hian Pu Henry C. Lalrawnkima, Secretary, MSSC chuan Khualzahawm ni thung a ni.

Sports Minister Pu Lalnghinglova Hmar chuan thu sawi in, Badminton-ah India a san avangin India rama lang phak nih chu khawvel a lang phak nihna a ni a ti a. Kum 2036 a India in Olympics thlen a tum ah pawh Mizoram infiammi te an tel ve ngei theih nana hma lak tan anih thu leh, Mizoram atanga badminton player-te that dan en in, olympic-a an lan theih a hnai riau nia an hriat thu leh, Sorkar in Empowering Mizoram Sports tih hnuai a sports discipline a thlan bikah badminton a tel thu a sawi.

Khualzahawm Pu Henry C. Lalrawnkima pawh in Sorkar kaltlanga Badminton Centre tha tak mai kan nei thei chu lawmawm a tih thu a sawiin Badminton inkhelmite te la zual sauh turin a fuih.

Report atanga a lan dan in, tun dinhmun ah TATA Trusts, NEIDA, PGBA, MSSC leh MBA-te thawhhona hnuai ah Mizoram hmun hrang hrangah Grassroot Centre 24 a awm mek a, chungah chuan naupang 1047 an in ziak lut. Tin, Kolasib leh Champhai ah Elite Centre din a niin, hengah hian badminton training lai mi 27 an awm a, RCTC, Zuangtui ah mi 20 awm mek in, PGBA-ah mi 9, TATA Trusts lam in an sponsor mek bawk a ni.

Heng Centre pahnih hawnna programme hi Pu Laltanpuia, Treasurer, MBA chuan a kaihruai a, Prof. Lalhriatzuala, Secretary, MBA Project Monitoring Committee hnen atangin report ngaihthlak a ni.

He programme hnu khar nan hian Pu Lalchhuanawma, Vice President, MBA chuan lawmthu sawina hun a hmang bawk.

Attachment