Aizawl, the 15^th of May, 2025: Vawiin khan Sports & Youth Services Minister Pu Lalnghinglova Hmar, Aizawl West-II MLA ni bawk chuan a bial chhung atanga Indian Super League 2024-25 champion Lalengmawia Ralte, Vaivakawn (Mohun Bagan SG) leh Super Cup 2025 champion Ayush Dev Chhetri, Dinthar (Goa FC) te chu MINECO-a a office chamber-ah lawmpuina hun a hmanpui.

Sports Minister Pu Lalnghinglova Hmar chuan, "Vawiinah hian kan footballer-te hian chawimawi an phu tawh a, club-ah hlawhtlinna an neih mai bakah India team player an ni tawh. Mizoten kan hriat dan tlangpuiah chuan India team thlenga han khel pha tur chuan academy atanga mi vannei bik nih a ngai tih ang kha a ni thin a, mahse anni pahnih hi Mizoram atanga anmahni a insualchhuak an ni a, midangte pawhin an ti ve thei a ni tih a takin an lantir" tiin footballer hlawhtlingte lawmpuina hun hman a nih chhan a sawi. 

"Mizoramah hian talent a awm a, kan tualchhung football kal dan pawh a fuh chho zel a, mi zawng zawng tan football hi hlawhtlinna ni thei lo mahse mi taima, mi vannei leh talent nei tha bik tan chuan hlawhtlinna, hmingthanna leh ram leh hnam chawimawinate a ni thei a ni, " tiin a sawi bawk.

Kum 2024-2025 Indian football season liamtaah khan India tana vawi 24 inkhel tawh Mohun Bagan midfielder rinrawl Apuia'n club tan inelna hrang hrangah match 27 a khel a, heng zinga vawi 25 hi inkhel bul tantu niin ISL champion trophy an chawina kawngah player pawimawh a ni a, ISL Playoff-ah final ah pawh a thawh hlawk ber a ni.

"ISL kan champion a ni emaw, India tana kan khelh pawhin, mahni state Sports Minister te’n lawmpuina hun an hmanpui hi hmun dangah a awm ngai pawhin ka hre lova, kan Sports Minister chungah lawmthu ka sawi." a ti a. "Football lovah pawh, engkimah theihtawp chhuah hi a pawimawh a. Midangten an tih bakte, an tih ve loh laia tih hram hramte hian rah tha a keng thin. Malsawm tlak a kan nun hmasak a pawimawh a, Pathian pawhin mal a sawm duh thin niin ka hria." tiin naupang zawkte hriat atan thu a sawi.

Footballer nih tum la naupang zawkte tan sawi bawkin, "Nu leh pa thuawih a pawimawh ber ka ti a, anni aia min hmangaihtu an awm lova, malsawmna kengtu a ni. Football bikah chuan academy tha a awm a tha a, mahse a pawimawh ber chu mahni inzir zau peih a ni a, awm ve theih loh pawhin mahni in a beih tlat theih a ni." a ti.

FC Goa midfielder Ayush Chhetri hian a club tan tun season-ah inelna hrang hrangah vawi 26 a inkhel a, goal 1 khungin tunhnaiah club tana a chetthat avangin kumin khan India tan a vawikhatna atan Maldives hmachhawnin a inlan tawh. An puala lawmpuina hun hman a nih chu lawmawm a tih thu a sawi ve bawk.

Minister hian footballer-te hi lawmpuina thuziak leh pawisa fai cheng sing khat ve ve a hlan a. An vengchhungah anmahni kaltlangin grassroots football in hma sawn se an duh thu a sawi a, Dinthar leh Vaivakawn mai bakah hmundanga thalaite tan entawn tur leh a kawng hawngtu nise an duh tih a sawi.

Vawiin lawmpuina hunah hian footballer-te leh an chhungte bakah Mizoram Football Association hruaitute, sawm bikte leh chanchinbu mite an tel a ni.

Attachment