Aizawl, the 30th September 2022: 36th National Games Gujarat a neih mek ah Zakhuma chuan Weightlifting 61Kg (Men) ah Mizoram tan medal la hmasa ber in Bronze medal a chawi chhuak!
Weightlifting hi Mahatma Mandir Exhibition Hall ah intihsiakna hi neih a ni a, Snatch-ah 113Kg, Clean & Jerk ah 141Kg chawiin, Total 254Kg a chawi a, Bronze Medal a chawi chhuak a ni.
India ram chhunga infiamna khawmpui lian - 2022 National Games of India hi September 29, Ningani tlai khan Prime Minister Narendra Modi chuan Narendra Modi stadium, Ahmedabad, Gujarat-ah a hawng a, hawnna inkhawmah hian Mizoram atangin Sports Minister Pu Robert Romawia Royte, Sports Department Secretary Pu Lalrozama IAS, Mizoram Olympic Association (MOA) Vice President Pu Lallianthuama leh MOA Joint Secretary Joseph Thansanga te an tel a ni.
Chef de Mission Pu V. Lalzawmliana leh Dy. Chef de Mission Pu Lalduhkima Sailo hovin discipline hrang hrang - Football (Women), Archery, Weightlifting, Athletics, Judo, Boxing, Swimming, Wushu leh Wrestling-ah te Mizoram chuan infiammi mipa 16 leh hmeichhia 29, bakah Coaching Staff leh Official nen an vaiin mi 60 a tir.
Mizoram inlan hun hetiang hi a ni ang-
Archery : September 30 atangin
Football (Women) : October 1-11
Weightlifting : September 30 atangin
Boxing : October 5 atangin
Judo : October 7-11
Athletics : September 30-4 October
Swimming : October 2-8
Wrestling : September 30-2 October
Wushu : October 8-11
36th National Games hi 29 September - 12 October, 2022 thleng neih a ni ang.
Mizoram State Sports Council chuan Weightlifter Zakhuma a lawmpui takzet a, midangte pawh hlawhtling ngei turin duhsakna a hlan a ni.
Attachment
