Dated Hnahthial, the 26th October, 2024: Mizoram Boxing Association(MIZBA) leh Hnahthial District Boxing Association (HADBA) te tangkawpin a an buatsaih - 43rd State Boxing Championship, 2024; GSA Hall, Hnahthial District a neih chu nizan khan kharna hun hman a ni a. He hun hi South Tuipui bialtu MLA Pu Jeje Lalpekhlua'n khuallian niin a hmanpui.
Khuallian chuan kalkhawm zawng zawngte chu chibai bukin Boxing Championship, Hnahthial District-a thlen a ni chu lawmawm a tih thu a sawi a. Boxing chu sports zingah pawh taksa hrisel leh fit that ngai ber te zing ami anih avangin insum theihna leh tih hram hramna nun neih a pawimawh thu a sawi a. Chumi anih vang chuan Boxers ho te chu chhuanawm a tih thu sawiin nun entawntlak nei zel turin a chah nghal a. Boxer ho fuihna thu sawiin boxing lam an tui tak tak a, National level te thlen phak an duh chuan chhuanlam siam lovin an phak tawk theuhvah theihtawp chhuah tura a duh thu sawi a. A tum tak takte chu sawrkarin puih a inhuam reng thu sawiin Hnahthial district chu sawrkarin a thlahtlam bik dawn loh thu a sawi bawk a ni.
Mipui kalkhawmte hnenah thu sawiin Hnahthial District mipuite chuan tun sawrkar hmalakna, Handholding policy te leh CM special package te chu zir chiang a, he hmalakna hi hmang tangkai ve ngei turin a chah a. Infiamnaah a ni emaw, kut hnathawh kawngah a ni emaw, sawrkar chuan theihtawp chhuah tute chu chawi kan a hreh loh mai bakah a tum ber a nih thu sawiin mipui kalkhawmte chuan sawrkar hmalakna hrang hrangte chu an tan a ni tih hria a, hmang tangkai tura a duh thu a sawi a ni.
Khuallian chuan infiamna lama hlawhtling tur chuan insum theih a ngaih thu a sawi a. Hnahthial district chu tun hnai record en chuan HIV vei an tam bakah ruihtheihthil ti an tam chu thil veiawm tak anih thu a sawi a. Sawrkarin hmalakna hrang hrangte nei thin mah se a tawpah chuan mipuite chu an pawimawh ber a ni a ti a. Infiamna lamah te, zirna leh kawng engkimah hma kan sawn zawk theih nan ruihhlo do na kawnga tangrual turin kalkhawm mipui zawng zawngte chu a sawm nghal a ni.
Boxing Championship kharna hunah hian MIZBA member te leh HABDA member te bakah Hnahthial SP, Pu Manny Bhushan Singh leh Addl SP Pu Beimosia Lapi te an tel a ni.
October ni 22-25 inkara Boxing Championship neih zawh takah hian District hrang hrang atangin boxers te inel turin an kal khawm a. District hrang hrang atanga Boxers tel dan chu tiang hi a ni:
Hnahthial district - Mipa : 13
Kolasib district - Mipa : 13
Mamit District - Mipa : 6
Aizawl District - Mipa : 33 ; Hmeichhia : 5
Aizawl SAI - Mipa : 10 ; Hmeichhia : 9
MSSC - Mipa : 7 ; Hmeichhia : 2
Champhai - Mipa : 22 ; Hmeichhia : 4
Khawzawl - Mipa : 4
Serchhip - Mipa : 21
Lunglei SAI - Mipa : 18 ; Hmeichhia : 5
Lawngtlai - Mipa : 10 ; Hmeichhia : 6
Siaha - Mipa : 23; Hmeichhia : 2
MRP - Mipa : 6
District zawng zawng atang hian a vaiin Mipa 186 leh Hmeichhia 33 te an tel a ni.
A pumpuiin Hmeichhe team ah Aizawl SAI chuan Gold Medal - 6, Silver - 1 leh Bronze - 1 lain team champion an ni a, pahnihna lawmman chu Lunglei SAI in an la a ni.
Mipa team champion chu Lunglei SAI niin Gold - 9, Silver - 4 leh Bronze - 1 an la a, pahnihna lawmman Aizawl SAI in an la a ni.
Best Boxer Hmeichhia-ah Lalrinngheti, Aizawl SAI thlan niin Mipa-ah Lalhruaitluanga, Hnahthial thlan a ni bawk.
Hnahthial District bik hian a pumpuiah Gold- 2, Silver -3 leh Bronze -3 an la a ni.
Attachment
Written by: F Lalrinfela, MIS, DIPRO - HNAHTHIAL
