Aizawl Ni 31.7.23: Vawiin tlai dar 5:00 khan 7th Mizoram State Sports Council chuan an President leh Sports & Youths Services Department Minister ni bawk Robert Romawia Royte kaihhruaina in General Body Meeting tawp berna, Hawla Indoor Stadium, Conference Hall ah neih a ni a. He hunah hian 7th Mizoram State Sports Council hnuaia inziaklut Sport association hrang hrang 33 te hmalakna leh hlawhtlinna hrang hrang thlirho a ni.
Meeting kaihruaitu Sports Minister Robert Romawia Royte chuan sports in Mizoram tana kan hmasawnna hi kan za vaia thawhrah a ni, hei aia chak leh tha zawk kan thlen theih nan thawhhona tha zawk nei zel ang, a ti.
MSSC chuan sorkar kumthar 2023-2024 chhunga Sports Association te leh office inrelbawlna atan cheng nuai 1277.41 a ruahman a. State Level Association te tan sorkar kumthar atan cheng nuai 215.50 a dah a ni. Tin, District Sports Association 11 te in enkawl nan cheng nuai 25.35 a dah a ni bawk. Other Promotional Fund ah cheng nuai 156.10 leh Sports Medicine atan cheng nuai 5.50 dah a ni.
7th MSSC tana PMJVK scheme hnuaia hnathawh zawh fel tawh pariat leh hnathawh mek 78 a awm a. Khelo India scheme hnuaiah panga zawh a ni tawh. Tin, NEC sum hmanga hnathawh panga zawh ani tawh a. SASCE sum hmanga hnathawh pali awmin hnathawh mek pathum a awm bawk. CSR fund hmanga hnathawh mek pakhat, GIA, NLCPR pahnih leh SEDP sum hmanga hnathawh panga zawh a ni tawh a. Heng 7th MSSC hnuaia hnathawh mek hi cheng nuai 55404.40 a ni.
Sports ruhrel siam nan cheng vaibelchhe 543.86 ruahman a ni a. District Sports Complex te, Residential Sports School te leh adangte Central Sorkar leh State Scheme hrang hrang hmangin siam mek a ni. Football, Hockey leh Futsal inkhelhna atan Synthetic Turf (phullem) 15 phah zawh a ni tawh a, 9 siam mek a ni bawk. Basketball court 28 siam mek a ni a, volleyball court 28 siam a ni bawk.
MSSC 2022-23 chhunga Non Residential Coaching Programme hnuaiah mipa 366 leh hmeichhia 97 an vaiin 463 an awm a, NRCP hnuaiah National levelah medal 3, Regional hnuaiah 12 leh State Level 42 a vaiin medal 57 lak a ni tawh bawk a ni.
Attachment
