No.2589/2021-2022

Aizawl. 13th October, 2021: Vawiin khan Mizoram Boxing Association (MIzBA) buatsaihin Asian Elite Men & Women Boxing Championship 2021-a Silver Medal dawngtu Nl. Lalbuatsaihi chawimawina hun Aijal Club-ah neih a ni a. Sports Minister Pu Robert Romawia Royte chu he hunah hian khuallian niin Mizoram Sawrkar chuan lawmpuina cheng nuai nga (5) pek a tum thu a sawi a ni.

Pu Robert Romawia Royte chuan Lalbuatsaihi a lawmpui thu leh chhuanawm a tih thu sawiin kan hnam kan ram leh India timawitu a ni a, Mizoram Sawrkar leh Mizo mipuiin kan chhuang a ni, a ti. Mizoram chu Sawrkar Laipuiin Khelo India Centre of Excellence dinna tur atana a thlan chhuah state tlemte zingah telin Mizoram tan discipline pathum - boxing, judo leh weightlifting te thlan a nih thu he hunah hian a sawi a. Head Coach te pawh lak fel tawh niin RG Stadium bula hostel pahnihah heng discipline atanga infiammi beiseiawm mi 100 theuh thlan chhuah te chu ngawrh taka training pek an nih bakah a thiam zual tan High Performance Centre din chhoh zel tumna a awm thu Sports Minister chuan a sawi. MIzBA hruaitute leh professional boxer promoter te rilru zau tak pu tura chahin Pu Robert Romawia Royte chuan amatuer leh professional boxer te thliar hrang lovin, International Olympic Association leh Indian Boxing Federation pawhin a lo pawm tawh angin national leh international level-ah Mizoram aihawh turin boxer tha ber ber te tirchhuak thin turin a fuih bawk a ni.

Sports hmasawnna tura Mizoram Sawrkar hmalakna thenkhat tarlangin Pu Robert Romawia Royte chuan Sports Policy 2019 avang leh Mizoram Sawrkarin Sports chu Industry-a a puan tak avangin project lian tham siam leh umzui kawngah ko ri a tu hle tih a sawi a. Sum haichhuah theihna tur nia an beisei ngam lohna atang te pawhin hmasawnna hnathawhna tur sum tam tak hailuh theihna kawng a sial a, Mizorama sports hmasawnna turin tam tak hai luh a ni tawh a, hmalak zel tum a ni bawk tih a sawi a ni.

Nl. Lalbuatsaihi hian kum 2005 atanga boxing khel tanin State Level ah gold medal 25 a la tawh a. North East level ah gold 1, silver 2 leh bronze 3 a la tawh a. National level ah gold 1, silver 1 leh bronze 3 a hlawhchhuak tawh a. World Police & Fire Games 2019 ah gold medal a la a, National Police Games 2019 ah gold medal lain kum 2020-ah khan silver medal a dawng bawk a ni.

Vawiin Programme hi MIzBA Sr.Vice President Pu F. Lalnienga’n a kaihruai a. MIZBA President Pu C. Laltanpuia leh Sports Addl. Secretary Pu F. Lalrinawma’n thu sawiin MIzBA Youth Commission Chairman Pu Lalduhkima Sailo chuan Nl. Lalbuatsaihi zinkawng kalkhawmte hmaah a sawi a ni.




Written by: Lalnunmawii, MIS, Deputy Director