No.2041/2021-2022
Aizawl dated 28th August 2021: Vawiin chawhnu khan Regional Sports Training Centre, Saidan Kolasiba Astro Turf Football Ground leh Khelo India Football Centre chu Pu K. Lalrinliana, Food, Civil Supplies and Consumer Affairs Department Minister leh Pu Robert Romawia Royte, Sports and Youth Services Department Minister-te chuan hawnna hun an hmang a. Pu Lalsangliana, Director, Sports & Youth Services Department chuan hun kaihruaiin Dr. K. Pachhunga, MLA, Er. H. Lalzirliana, MLA, Nl. Lalremsiami, Olypian, S&YS Department a hotute leh Kolasib district-a Department hrang hranga hotute an tel bawk a ni.
Supply Minister Pu K. Lalrinliana chuan Mizoram sawrkarin infiamna tih hmasawnna tura hma nasa taka a lak meknaah thalai tam zawkin hmasawnna leh hlawhtlinna nasa zawk an chan phah ngei a beisei thu sawiin Kolasib district-a khelmual tha tak awm tur chu lawmawm a tih thu a sawi. Regional Sports Training Centre, Saidan chuan a chhevel veng leh khua a infiam mite tan hmasawnna tam tak a thlen thu Pu K.Lalrinliana chuan tarlangin Astro Turf Football ground leh District Khelo India Football Centre hawn takte pawh hian Kolasib mipuite tan infiamna kawnga malsawnna nasa zawk thlentu a nih ngei a beisei thu a sawi bawk a ni.
Sports Minister Pu Robert Romawia Royte chuan infiam mi mitha chherchhuahna hmun tur District Khelo India Football Centre, Kolasib hawn a ni chu lawmawm a tih thu sawiin Fifa Approved Football field hmasa ber a nih thu a sawi bawk a ni. Sports discipline hrang hrang tihhmasawnna tura Mizoram sawrkar hmalaknate tarlangin District Khelo India Football Centre, Kolasib chu Kolasib infiam mite mai bakah Mizoram hmun hrang hranga infiam mite tih hmasawnna hmanraw tangkai ni tura hman a nih theih nan duhsakna a hlan nghal bawk a ni.
Khelo India Football Centre, Kolasib hi Khelo India Scheme hnuai a Rs. 5 Crore seng a sak niin Mizorama FIFA approved ground hmasa ber a ni a. A zau zawng hi 115m × 74m niin a inkhelh theihna lai zau zawng hi 110m×68m a ni a, MANIDCO hnuai a Decor India te sak a ni.
Attachment
Written by: Dr. Hmingthanzuala, MIS, DIPRO - KOLASIB
