THAZUALA A RAWN COME BACK, A HLIAM A DAM TA!
RAMSANGA TAN SILVER MEDAL PAHNIH
REMPUII’N BRONZE MEDAL A DAWNG BAWK
Panchkula, dated 2nd May, 2025: India rama Badminton inelna lian leh ngaihhlut hlawh, Yonex-Sunrise All India Junior Ranking Badminton Tournament 2025, Panchkula, Haryana hmuna April ni 25, 2025 atanga May ni 2, 2025 chhunga neih chu tluang taka zawh a ni.
He tournament-ah hian category panga (U-19 Boys' Single, Boys' Doubles, Girls' Single, Girls' Doubles leh Mixed Doubles) ah inelna neih a niin, category pathum ah kan Mizo rawlthar ten final an lut!
H. Lalthazuala, s/o H. Zohmangaiha, Chanmari West chu U-19 Boy’s singles category-ah a champion a, tin, C. Lalramsanga, s/o C. Lungmuanpuia, Durtlang chu category pahnih ah final lut in, final ah hian a vanduai ve ve a, U-19 Mixed doubles leh U-19 Boy’s doubles-ah te silver medal a dawng thung a, Lalrempuii, d/o Albert Lalrosanga (L) chuan bronze medal a hlap chhuak bawk!
Thazuala a dam ta!
Nikum lamah inhliam tenau a neih deuh reng avangin beisei a pha lo a, tunah erawh a hliam a dam. Season bul tanna tournament hmasa ber ah Thazuala a champion a, National level tournament-a singles category ah vawi 4 a champion-na niin a rawn comeback mawi hle. He tournament-ah hian Thazuala hian seeded 11-na ni chungin inelna a hmachhawn a, round of 64-ah Mahendra Kalahasthi chu 18-21, 21-13, 21-13 in a hneh phawt a, round of 32-ah Dhyan Santosh chu 21-17, 21-12 in, harsatna awm loin a paltlang. Hemi hnu hian round of 16-ah Dev Ruparelia nen intum in, 21-23, 21-19, 21-10 in a chak leh a, quarter final-ah India ranking-a no 2 leh he tournament-a seeded 2 ni bawk, Pranauv Ram N. chu 21-18, 21-15 in, straight set in a hneh. Semi final-ah kum in National Games neih zawh tak Badminton game-a silver medalist, Suryaksh Rawat (seeded 8) chu 21-14, 23-21 in, straight set bawkin a hneh leh a ni. Final-ah hian he tournament-a seeded no 3, Ansh Negi nen intum in, 21-19, 21-16 in straight set bawk in a chak a, a champion.
Thazuala hi TATA Trusts, NEIDA, MSSC leh MBA te thawhhona hnuaia din, Grassroot centre leh Regional Development Centre (tunah chuan RCTC tih a ni tawh) chhuak a niin, Pullela Gopichand Badminton Academy (PGBA), Hyderabad-a inzir mek a ni. Nikum kum tir lamah U-19 Boy’s singles category-ah Thazuala hian final a lo thleng tawh a, a ke hliam avangin a khel tluan thei lo, chumi hnu ah result tha nei hlei thei loin a awm reng a, final a luh lehna hmasa berah erawh Mizoram tan history rawn siam in, Junior National Ranking Tournament-a Boy’s singles category-ah champion thei hmasa ber a ni.
Ramsanga tan silver medal pahnih!
Final-ah a vanduai tih loh chu he tournament hi Ramsanga tan tournament tha leh chhinchhiah bik tlak a ni. Under-19 Mixed doubles ah Pragati Parida nen inkawp leh in, seeded no 2 niin tournament an hmachhawn a. Tin, U-19 Boy’s doubles category-ah Bjorn Jaison nen tangdun in, seeded no 3 ni chungin inelna an hmachhawn. Mixed doubles category bik ah hian round of 32 atanga semifinal thleng in straight set vek in an chak a, an tumpui ten an khan lo thin hle. Final hmuhnawm takah seeded no 7, Bornil Akash Changmai leh Zennith Abbigail-te inkawp chu an tum a, 21-17, 21-23, 19-21 in a vanduai zawk ah an tang. Boy’s doubles category lamah erawh round of 32 atanga semi final thleng deciding game hmangin an chak chho char char a, final-ah hian seeded no 1 pair, Vishnu Kedhar Kode leh Mithileish P. Krishnan-te nen intum in, deciding game-ah 15-21, 22-20, 17-21 in, a vanduai zawk ah an tang leh a, silver medal 2-ah a lungawi a ngai ta hrih a ni. Mizo zingah National Junior Ranking tournament pakhat a category 2-ah final thleng thei awmchhun a la ni nghe nghe.
Ramsanga hi Tata Trusts leh MBA te thawhhona atanga PGBA-a a thin a ni a, tunah erawh National Centre of Excellence, Guwahati ah a inzir chhunzawm mek.
Rempuii’n bronze medal a hlap chhuak bawk!
Serchhip tleirawl, Lalrempuii, d/o Albert Lalrosanga (L) pawh in category 2-ah inelna a hmachhawn a. Girl’s Doubles-ah Tanoo Chandra-i nen inkawp in, seeded no 2 an ni. Tin, Mixed doubles lamah Saurav Sahu nen tangdun in, unseeded an ni thung. Girl’s doubles category-ah hian final thleng ngei tura ngaih an nih laiin, semi final-ah an lo hnen tawh thin, Taarini Suri leh Shravani Walekar (seeded 4) te lakah an chesual palh a, bronze medal an dawn phah ta a ni.
He tournament-ah vek hian Sainunmawia Sailo leh a partner, Aksh Singh-te chuan qualifying atanga bul tanin quarter final an in vaw thleng a, round of 32-ah seeded no 2 te an vaw tla nghe nghe. Tin, Malsawmhlua leh a partner, Girivasan Saravana Kumar -te pawh in qualifying round atanga bul tanin, quarter final an thleng a, seeded no 1 leh he tournament-a champion tate lakah hian 21-18, 21-17 in a vanduai zawk ah an tang bawk.
Lawmthu sawina
Hetiang taka National Level tournament-ah an nau te an chet that avang hian Mizoram Badminton Association chu an lawm in an phur tak zet a. Gold medal 1, Silver medal 2 leh Bronze medal 1 nena tournament khartu kan Mizo naupangte an lawmpuiin, an hma a inchhawp tournament leh training an hmachhawn zel turah pawh duhsakna sang ber an hlan a ni. Tin, badminton in hma a sawn theih nana an thawhpui, TATA Trusts te, NEIDA te, PGBA te leh MSSC te chungah lawmthu an sawi tak meuh meuh a ni.
____________________________________________________________________________________
Mizoram Shines at All India Junior National Badminton Tournament 2025!
The Mizoram Badminton Association (MBA) proudly extends its heartfelt congratulations to H. Lalthazuala, s/o H. Zohmangaiha, Chanmari West, Aizawl for his outstanding achievement in winning the U-19 Boys’ Singles title at the Yonex-Sunrise All India Junior National Badminton Tournament 2025, held in Panchkula, Haryana.
Lalthazuala, a promising young talent from Mizoram, is currently undergoing advanced training at the prestigious Pullela Gopichand Badminton Academy (PGBA), Hyderabad, fully sponsored by TATA Trusts in collaboration with NEIDA, PGBA, Mizoram State Sports Council (MSSC), and Mizoram Badminton Association. His remarkable performance is a testament to the hard work, discipline, and dedication he has consistently shown, and it marks a proud moment for Mizoram's sporting community.
In the same tournament, C. Lalramsanga, s/o C. Lungmuanpuia, Durtlang, Aizawl delivered an equally commendable performance, clinching two silver medals in the U-19 Mixed Doubles and U-19 Boys’ Doubles categories. Meanwhile, Lalrempuii, d/o Albert Lalrosanga (L), Serchhip secured a bronze medal in the U-19 Girls’ Doubles category, further highlighting the growing excellence of badminton players from Mizoram on the national stage.
Both Ramsanga and Rempuii are former trainees under PGBA, having been supported through the same Tata Trusts-sponsored program. They are now currently training at the National Centre of Excellence, continuing their journey of development and pursuit of excellence at the highest levels of the sport.
The Mizoram Badminton Association deeply appreciates the continued support and collaboration from Tata Trusts, NEIDA, PGBA, MSSC, and all stakeholders involved in nurturing these young talents. These recent victories are not only a personal triumph for the athletes but also a proud milestone for Mizoram and the North-East region in Indian badminton.
Issued by: Media & Publicity, MBA
----------------------------------------------------------------------------------------------------------------------
Mizoram State Sports Council chuan Mizoram Badminton Association leh hlawhtlinna chang kan Mizo thalaite a lawmpui takzet a ni.
Attachment
