Dated Aizawl, the 6^th October, 2025: Kum 17 hnu ah India chuan BWF World Junior Championship 2025 a thleng leh dawn ta a. October ni 6 atanga ni 11, 2025 inkar hian team inelna, Suhandinata Cup tia hriat lar chu khelh a ni ang a. October ni 13 atanga ni 19, 2025 inkar chhung hian mimal inelna (individual event) neih a ni bawk ang. Khawvel pum huap inelna lian leh ngaihhlut hlawh hi National Centre of Excellence, Guwahati-ah khelh a ni dawn a, India team ah hian Mizo rawlthar pahnih, H. Lalthazuala, s/o H. Zohmangaiha, Chanmari West leh C. Lalramsanga, s/o C. Lungmuanpuia, Durtlang an tel.

India in BWF World Junior Championship a thlen hnuhnun ber chu kum 2008 kha a ni a tawh a. Tun tum Team inelna bikah hian ram hrang hrang 37 an inlan dawn. Group pariat ah thendarh an niin, India hi Group H-ah, UAE, Nepal leh Sri Lanka te nen an awm ho. Group tina a sang ber te hian quarter final an lut dawn a, tun tum ah hian India team-te hi seeded No. 2 an ni nghe nghe. Team inelna zawh anih hnu ah a hmun ngaiah mimal inelna hi neih chhunzawm a ni dawn a ni.

India aiawh tur hian selection trial an paltlang hnuah player 25 tlanchhuah an ni a. Chung zingah chuan Boy's Singles Category-a India aiawh tur player pali koh zingah Thazuala a tel. Tin, Mixed Doubles Category huanga India aiawh tur player pair 4 thlanchhuah zingah Ramsanga leh a partner, Taarini Suri-te an tel bawk a ni.

Tun tum ah hian State 13 atangin India aiawh tur player thlanchhuah an niin, BWF World Junior Championship-ah India aiawh tura Mizo player an tel vawi khatna a ni a, kumin hian North East state dang atangin player tel phak an awm lo.

India aiawh a khawvel huap inelna lian ber zing ami BWF World Junior Championship hmachhawn tur Mizo player te hi kan chhuang in, hriselna tha nei a, a theihna leh thiamna ang ngei a khelchhuak tur leh, a sang thei ang ber thleng turin duhsakna kan hlan a ni.

Attachment