Champhai, 21st April 2025: Vawiin khan Champhai District Sports Committee chuan I&PR Auditorium, CHANEM-ah hruaitu thar thlanna hun an hmang a. He hun hi Pu C. Hualrikhuma, Sr. Vice President chuan kaihruaiin Bawrhsap Pu Mohammad Aaquib, Champhai District Sports Committee Chairman ni bawk chuan a hmanpui a ni. 

Champhai Bawrhsap Pu Mohammad Aaquib chuan infiamna chu Mizote nuna bet tlat a nih thu sawiin, infiamna hrang hrang te chu a khelh dan dang mahse Mizote thinlunga a thawh dan erawh a inang vek a ni, a ti a. Sports Association hrang hrangte chu ṭhalai leh naupang zawkte huikhawm thiam turin a chah a, ṭhalai tam tak ruihhlo leh thil tha lo laka kan ven theih nan infiamna lamah theihtawp kan chhuah tlan a ngai a ni, a ti a. He mi kawngah hian Champhai District Sports Committee bakah Bawrhsap pisa pawhin theihtawp chhuahin Sports Association te chu a thlawp zel dawn tih a sawi a, an kal zelna turah duhsakna a hlan a ni.

He hunah hian Pu R. Lalbiakzuala, Asst. Secretary hnen atangin report ngaihthlak a ni a, Returning Officer Pu Ngulzathuama, SDO (S) kaihhruainain hruaitu thar thlanna hun hman nghal a ni.

Champhai District Sports Committee hruaitu thlan thar te chu:

Sr. Vice Chairman - Pu C. Hualrikhuma, Champhai District Football Association 

Vice Chairman - Pu R. Lalhmachhuana, Champhai District Body Building and Fitness Association 

Asst. Secretary - Pu R. Lalbiakzuala, Champhai District Basketball Association; te an ni.

Mizoram sawrkarin a ruat sa angin District Sports Committee Chairman hi District Bawrhsap niin Secretary hi District Sports & Youth Officer a ni a. Finance Secretary tur hi Mizoram State Sports Council leh OB thlan tharten an ruat leh ang. Mizoram State Sports Council hriatpui District Sports Association President bakah sawrkar department heng - UD&PA, RD, PHE, LR&S, H&FW, PWD, School Education leh I&PR Department aiawhte chu Committee member ah ruat sa an ni bawk a ni. 

Tun dinhmunah Champhai District Sports Committee hnuaiah hian Affiliated Association 24 an awm mek a ni.



Attachment



Written by: Lalchhuanawma Ralte, MIS, DIPRO - CHAMPHAI