Champhai, the 26th April, 2023: Nimin khan Champhai District Sport Committee hruaitu thlanna I&PR Auditorium, Chanem-ah neih a ni. He hunah hian Pu C. Lalrinzuala, Jt. Secretary, Mizoram State Sports Council chu Observer niin Addl. DC Pu M. Misael chu Returning Officer atana ruat a ni.

He hun hmanpuitu District Bawrhsap Pu James Lalrinchhana chuan Champhai District-a Sports Association hrang hrangte'n Sports tihhmasawn nana theihtawp an chhuah thin chu lawmawm tiin theihtawp chhuah chhunzawm zel turin a fuih a. Champhai District Sports Committee din thar leh a ni thei ta chu lawmawm a tih thu sawiin, Sports chu zirna tibuailo a kalpui theih a ni, a ti bawk a. Champhai District chuan sports-ah penkhatin vawiin atang hian hma kan sawn leh a ni a ti a, hruaitute pawh Champhai District Sports tana theihtawp chhuah chhunzawm zel tur leh lungrual taka thawk tlang turin a chah bawk.

Champhai District Sports Committee Chairman chuan sports-a hma kan lak that chuan thalai ruihlo khawih tur kan veng thei a, ruihhlo laka kan thalaite an liam mai loh nan infiamna hi i uar sauh sauh ang u tiin kalkhawmte chu a sawm bawk a. Hriselna, Zirna leh Infiamna chu thil kalkawp tlat a nih avangin kan ngai pawimawh tur a ni tiin, hlawhtling tak tak tur chuan kan thil tihah kan tumruha kan taimak a ngai a ni, a ti bawk.

Vawiin District Sports Committee hnuaia Sports Association-te chanpual post hnawhkhah ngai atan chuhtu awm lovin heng mite hi an tlinga puan a ni.

1. Sr. Vice Chairman-ah Pu C. Hualrikhuma, President, Champhai District Football Association (CDFA)

2. Vice Chairman-ah Pu R. Lalhmachhuana, President, Champhai District Bodybuilding & Fitness Association (CDBFA)

3. Asst. Secretary-ah Pu R. Lalbiakzuala, President, Champhai District Basketball Association (CDBA)

Heng bakah hian District Sports Committee hnuaiah hian Sawrkar inkaihhruaina siam dungzuiin Chairman atan Deputy Commissioner, Secretary atan District Sports & Youth Officer (DSYO), Fin. Secretary tur Mizoram State Sports Council (MSSC) in a ruat dawn bakah, Ex-officio member Line Department hrang hrang 8 aiawhte an tel bawk a ni.

Champhai District Sport Committee hruaitu thlanna hun hi Addl. DC Champhai Pu M. Misael, Returning Officer atana ruat chuan a kaihruai a, Pi Esther Leihang, SDC Champhai chuan lawmthu sawina neiin inthlanna hun hi a khar a ni.


Attachment



Written by: Dr. Lallawmkima Thangluah, MIS, DIPRO - CHAMPHAI