Aizawl, 08.03.2023: Khelo India Scheme atanga sumcheng nuai zanga hmuh hmanga 1st Bn. MAP Ground, Armed Veng a Synthetic Football Turf phah leh Gallery siam chu vawiin khan a hawnna inkhawm neih a ni a. Chief Minister Pu Zoramthanga chuan khuallian niin a hawng a, Sports & Youth Services Minister Pu Robert Romawia Royte chu khualzahawm a ni.
Chief Minister chuan football ground changtlung tak mai bakah hmun danga kan la neih ngai loh gallery hnuai lama in lian tha tak, tangkai taka hman theih tur nen lama ruahmanna vawiin hawn a ni ta chu lawmawm a tih thu a sawi a. Mizoramah chuan sports infrastructure entawntlak ber zing ami nia a hriat thu a sawi. Chief Minister chuan kum hmasa lama khawvel pum chu covid natna in tuam velin, inkharkhip ngaia hmasawnna hna pawhin nasa taka a tawrh hnu ah, a theihna apiangah a remcham dan ang anga sawrkarin hma a lakna rah pakhat vawiina a lan tak thu a sawi a. Indopui laiin ram thenkhatah chuan haw lehna tur chenna in pawh neilo khawpin chhiatna a thlen dan leh chuti chunga tumruhna nen intung ding leh a, ram hausa leh changkang ber ber a an insiam dan sawiin, Chief Minister chuan chhiatna te hi a aia ropuia dinchhuah leh theihna a nih thu a sawi a. Covid hripui khan min tibuai in, hanthawh te titawp mahse vawiina kan field hawn tak hian mak leh mawi leh tha in kan chhuah thei a ni tih a lantir thu a sawi.
Chief Minister chuan thalaite fuihna thu sawiin, ruihtheihthil khawih chîn hian rualbanlo ah min siam in, infiamna kawngah te tui viau pawh ni mah ila kan nih theih ang tur ni theilo a min siamtu a ni, a ti a. An thil tumah tumruhna nen theihtawp chhuah zel tura fuihin naupang leh thalai kalkhawmte chu zu leh ruihhlo laka fihlim turin a chah a ni.
Home Minister Pu Lalchamliana pawhin thu sawiin, astroturf phah leh a sira a behbawm tur nen tha taka peih a ni ta chu lawmawm a tih thu a sawi a. Thalaite infiamna lama an tuihalna hria in sawrkarin an tan hma a lak thu sawiin, sports infrastructure tihhmasawnna atan state budget chauh rin theih nilo mah se a changtu Minister leh department thawktute thahnemngaihna avangin hmun dang atanga sum lakluhna tur ngaihtuah a, Sports hmasawnna ruhrel changtlung leh tha tak tak din a ni ta chu lawmawm a tih thu a sawi a. Vawiina field hawn tak chu a hmangtute zawng zawngin tha taka enkawl a, thalai leh naupang te'n tangkai taka an hman a duhsakna a hlan a ni.
Minister Pu Robert Romawia Royte chuan 1st Bn. MAP Ground tihchangtlun chungchangah sports department leh police te chu thawhhona tha tak nen hma lak hovin vawiin ni hi thleng ta a nih thu a sawi a. A ground neitu police lamin inhawng taka midang hman theiha ruahmanna an siam mai bakah Armed Veng leh Armed Veng South tan phei chuan man chawilo a hman theiha inremsiamna a awm zel chu lawmawm a tih thu a sawi a. Police pawhin football team nei belh zelin, field tha mamawhna a lo len zel avanga an tana tangkai tur siam a ni chu a lawmpui thu a sawi. Sports Minister chuan football chauh nilo sports discipline dang dang hmasawnna tura hma a lak dan leh hmalak a nih zel tur thu a sawi a. Sports lama hmalakna thar ruahman 'holiday sports' kal pui țan tum a nih thu a sawi bawk a. Naupang te'n hun awl an hman tangkai nan te, an hriselna atana taksa insawzawina hun remchang a nih nan te, talent nei bikte zawn chhuah a tihhmasawn nan leh sports lama hma lo sawn nan te hmalak tum a ni thu a sawi bawk.
Pu John Neihlaia, IGP leh Mizoram Football Association leh Armed Veng YMA aiawhte atangin thusawi tawi ngaihthlak a ni bawk.
He inkhawmah hian MLA Pu H. Lalzirliana leh Prof. F. Lalnunmawia te an tel bawk a. Sports & Youth Services Department Secretary Dr. Lalrozama chuan inkhawm hi kaihruai in Mizoram State Sports Council Secretary Pu John Tanpuia chuan hnathawh dan technical report a pe a. SYS Director Pu K. Lalrohlua chuan lawmthu sawiin hun a khar a ni.
Techincal Report: Synthetic Football Turf, 1st Bn MAP Football Ground, Armed Veng, Aizawl siamna atan hian November ni 25, 2019 khan Khelo India Scheme, Ministry of Youth Affairs & Sports, Government of India atangin Rs. 500.00 lakhs hmuh a ni a. Tender chhuah nghal niin he hnathawk tur hian Décor India- Complete Sports Solution, G.S. Road, Guwahati chu thlan a ni a. February ni 26, 2020 khan Work Order pek a ni. Amaherawhchu, Covid-19 hripui leng avangin hna hi ruahman ang a thawh chak theih a nih loh bakah a field area tih zauhna turin field thlang lam RCC Extension hna thawh hmasak a ni a, he hna thawktu tur hian tender chhuah a nih hnuah M/s Creative Minds, Chanmari West, Aizawl te thlan niin, heta tan hian SEDP atangin Rs.425.00 lakhs leh Khelo India Scheme atangin Rs.450.00 lakhs hmuh a ni. Grass phahna leh RCC extension atana pawisa hmuh belhkhawm hi a vaiin Rs.1,375.00 lakhs a ni. Grass phah hnathawh theih a nih velah chak taka thawh nghal niin, February ni 28, 2023 khan tha taka phah fel a ni.
He Project hnuaiah hian heng hna hrang hrangte hi thawh a ni :-
1) RCC Extension :- Football Playground thlang lam hi RCC framed structure hmangin a dung 114.00 mts leh a vang 17.00 mts a tih zauh a ni a, chhawng li (4) a sak niin, first basement ah hian hengte hi dah a ni :-
● Player's Changing Rooms (2 nos.)
● Dormitory Room (2 nos.)
● Match Official Room (1 no.)
● VIP Rest Room (1 no.)
● Medical and Doping Room (1 no.)
● Dining Hall (1 no.)
● Kitchen (1 no.)
● Gym Room (1 no.)
● Public Urinal (16 nos.) and toilets ( 6 nos.)
2) RCC Gallery - Playground sir thlang lamah hian RCC gallery (2 nos.) siam niin, a dung 32 mts leh a vâng 8.20 mts ve ve a ni a, hetah hian mi 1000 vel thu leng thei tura ngaih a ni.
3) Football Turf :- Synthetic Football Turf phah chin area hi 110 x hian 68 mts. niin, play area hi 105 x 64 mts. a ni a, a sirah free space 2 mts a zau dah niin goal post hnung ve ve ah 2.50 mts a zau daha ni bawk. Artificial Grass hi ACT Global Company, USA te siam a ni a, Goal Post, Substitution Bench leh Net bakah, Corner Flag-te pawh dah tel a ni.
A turf phah nan hian design thar FIFA approved "New Technology Drainboard System" hman a ni a. Hemi system tharah hi chuan tui hi lei chhungah lut lovin,a sirah luang khawmin paih vek a ni dawn a. Hei hian lei min leh lei tawlh awm thei lakah a veng hle tura ngaih a ni.
February ni 13, 2023 khan he football turf phah hi FIFA Accredited Lab-ten an test tawh a, kan grass phah hi tha an ti hle bawk a ni.
4) PCC/Semi-RCC Flooring leh compound lighting :- Synthetic Football Ground sir Main Gate awmna lamah hian zau tawk takin semi- RCC slab flooring inch 4 a chhah chhun a ni a, compound lighting tha tak pavilion leh gallery panna kawng leh field sirah te dah kual a ni bawk.
5) Pavilion for Football Ground :- Pavilion hi a dung 27.50 mts leh a vang 8.20 Sq mts. a zau a sak a ni a. Mi 200 vel thu thei tura siam a ni. A sir tawnah hian RCC Gallery mi 500 vel ve ve thut theihna tur siam a ni bawk.
6) Fencing :- Playground kual chhuak hian fencing tha tak siam a ni a, 2 mts. dan zelah ban phun niin, a skirting chin hi brick wall fencing a siam a ni a, a chung feet 5 a sangin PVC coated polysteel netting a siam a ni, Goal Post hnung Fencing 17 mts. ve ve a thui hi tihsan bik a ni a. A san zawng hi 6.5 mts. a ni. Pavilion zawnah Main Gate 6 mts. a zau siam a ni. Goal Post hnung zawn ve ve ah Emergency Gate 1.2 mts ve ve a zau dah tel a ni.
Attachment
Written by: Emily Lalrinpuii, MIS, PIO to Chief Minister
