Dated Aizawl, the 5th October, 2026: Vawiin khan R. Dengthuama Indoor Stadium, Mualpuiah Asian Games, 2026 Gold Medalist, Hockey Player pahnih - Lalremsiami leh Lalthantluangi te hmuahna leh chawimawina hun hman a ni a, Chief Minister Pu Lalduhoma chuan chawimawina a hlan.

He hunah hian Chief Minister Pu Lalduhoma chuan Lalremsiami leh Lalthantluangi te chu Mizoram atanga Asian Games-a medal la hmasa ber an ni thei chu chhuanawm a tih thu sawiin, Gold Medal-a Mizote'n Asian Games bul kan tan thei chu lawmawm a tih thu a sawi a, Oympic Games 2028-a tel tura an tlin zui avangin a lawmpui thu a sawi bawk a ni. CM chuan Lalremsiami leh Lalthantluangi te hlawltlinna hlutpui zia lantir nan Mizoram State Incentive Cash Award Scheme atangin Rs 25,00,000 (Rs. Nuai 25) ve ve hlan a nih tur thu a sawi a, Bana Kaih Scheme aṭangin Rs 15,00,000 (Rs. Nuai 15) ve ve pek belhin, a zavaiin cheng nuai 40 (Rs. 40 lakhs) ve ve Mizoram sawrkar aṭangin pek an ni dawn, a ti a. Incentive Cash Award sem hun pangaiah Mizo infiammi hlawhtling dangte rualin hlan tura ruahman a nih thu a sawi bawk.

Vawiina hlawhtlinna sang tak changa chawimawite hi Thenzawla Women Hockey Academy atanga zirchhuak an nih thu Chief Minister chuan sawiin, Mizote'n enkawlna tha kan dawn phawt chuan hockey-ah theihna sang tak kan nei a ni tih a lantir thu a sawi a. Khawvel huapa India thatna game a nih bawk avangin Bana Kaih Scheme ‘Empowering Mizoram Sports’ hnuaiah Hockey hi game thlan zingah dah a nih thu a sawi bawk. CM chuan Lalremsiami chu tuna a hlawhtlinna bakah hian infiamna huanga India ram chawimawina nopui, Arjuna Award dawng tura thlan a nih thu sawiin, Olympic Games lo awm turah India chu a qualify-pui thu a sawi a. Heng hlawhtlinna ropui tak tak a chan avang hian a hming chawia Hockey Ground siam an duh thu leh chumi atan chuan Kolasib Diakkawn GSA playground chu an ruahman mek thu a sawi bawk a ni.

Infiamna lama sawrkar hmalakna hrang hrangte tarlangin, Sports Minister Pu Lalnghinglova Hmar hmalaknain Sports Authority of India chuan cheng vaibelchhe ruk sengin Thenzawl Women Hockey Academy-a hockey turf phah that hna an khawih tan tawh thu a sawi a. Academy-a awmte’n nakin zela an hman tangkai theih tur, khum 30 awm theihna hostel sak mek a nih thu a sawi bawk. Hei bakah hian Ministry of Minority Affairs atangin Hnahthiala Hockey Ground siamna tur cheng Vaibelchhe 9.886 approval an hmuh tawh thu a tarlang bawk a ni.

Hriselna leh fitness chu sawrkarin a ngaih pawimawh chhoh zel tur thu Chief Minister chuan sawiin Physical Efficiency Test chu Written exam tluk zetin Excise constable hna lak hnuhnung berah pawh an dah pawimawh tawh thu a sawi a. Hei hi Mizoram chu fit leh hrisel zawka siamna hmanraw tangkai tak a nih thu leh Police constable lak turah pawh physical fitness chu dah pawimawh zel an tum tawh thu a sawi bawk. Hemi a nih avang hian thalaite chu hriselna ngai pawimawh a, infiamnate uar sauh sauh turin a chah bawk a ni.

Sports Minister Pu Lalnghinglova Hmar pawhin thu sawiin, India hmeichhe hockey team ten kum 44 hnuah Asian Games-ah champion an ni thei chu ropui a tih thu a sawi a. Lalremsiami chu chakna goal thuntu a ni tih sawiin, Mizoram mai bakah India ram a tihmingtha hle a ni, a ti. Sports Minister chuan Mizoram Sports Conclave 2024 atanga lo piang Empowering Mizoram Sports (EMS) chu Bana Kaih - Handholding Scheme nen tangkawpin sports tihhmasawn nan hma lak chhoh zel a ni, a ti a. Infiammite tan training kalpui chhoh mek a ni, a ti. Pu Lalnghinglova Hmar chuan EMS atang hian Hockey centre-te siamin, Hockey lama hma an sawn nan theihtawp an chhuah thu a sawi a. Lalremsiami leh Lalthantluangi te chu chhuanawm a tih thu sawiin an kal leh zelna turah duhsakna a hlan nghal a ni.

Vawiin Gold Medalists-te chawimawina hun hi Pu K. Lalthawmmawia, Commissioner & Secretary, Sports & Youth Services chuan a kaihruaiin Pu K. Lalthlengliana, President, Hockey Mizoram hnen atangin thusawi ngaihthlak a ni a. Lok Sabha MP Pu Richard Vanlalhmangaiha, Rajya Sabha MP Pu K. Laltluangkima, Minister of States leh MLA te, sawrkar hnathawkte, NGO leh Sports association hrang hrang aiawhte he hunah hian an tel a ni.

.....................................................................................................................................................................................................................

Home Coming and Felicitation of Lalremsiami Hmarzote & Lalthantluangi, Gold Medalists Asian Games 2026

photos.app.goo.gl/Prj4DsaGTRXqo2UaA

Attachment