Dated Aizawl, the 14th January 2025: Vawiin khan Chief Minister Pu Lalduhoma chuan Economic & Statistic Directorate Conference Hall-ah Infiammite Bana Kaih Programme (Hand Holding Empowering Mizoram Sports) a hawng.
Thu a sawinaah Chief Minister chuan, nikum June thlaah Mizorama a vawikhatna atan Mizoram Sports Conclave kan nei a, India rama infiamna lama hriatna thuk tak tak neite nen kan sorkarin sports hmasawnna atana kan hmalak dan tur inrawnkhawmna kan nei a. Khami tum khan Mizoram sorkarin Vision 2036 kan kalpui tur thu ka puang a nih kha.
India ram hian kum 2036 Olympic lo awm tur khi thlen a tum a, dilna pawh a thehlut tawh a, kan Prime Minister Pu Narendra Modi leh ram hruaitu lian te pawh an phur hle a. He Olympic lo awm tur hi thlirin Mizo thalaiten India ram aiawha Olympic 2036 a an inlan ve ngei theih nan vawiin atangin hma kan lo la ve dawn a ni. Kan tihtur hmasa chu kan naupang talent nei thate zawn chhuah a nih angin vawiinah chu mi hmalakna tur Empowering Mizoram Sports kan hawng ta a ni.
Kan thalai thlan chhuahte hnena training tha pek mai bakah Sports Infrastructure tha tak tak neih belh pawh kan tum dawn a. Olympic Sports discipline, Mizote khelh theih chi, infrastructure kan la neih si loh lamah kan mit kan len ang. Sports Minister tha tak kan nei a, a thlamuanthlak a, kum reiloteah hmasawnna hmel duhawm tak tak kan hmuh ngei ka ring, a ti.
EMS kalpuitute chu huapzo hmalakna, a tling leh tlak te ngei dapchhuah hna lo thawk turin a chah bawk.
Pu Lalnghinglova Hmar, Sports & Youth Services pawhin thusawiin, EMS hmalakna hian thingtlang kilkhawr ber ber a thleng phak dawn a. Nimahsela, a thlawna inpek hi kan kalphung a nih loh avangin sawmna kan dawnna hmun kan pan thin ang. A bik takin Olympic Sports discipline, mizoten theihna an neihna ni si lamah zel kan insawrbing ang. Sawrkarin amahin engmah a kalpui thei lo va, khawtina khawtlang hruaitute leh Mizoram State Sports Council te nena tang tlangin kan kal dawn a ni, tiin an kalpui dan tur sawifiahna a nei. Thawhpui atana corporate lian tak tak nena an inbiak mek thu pawh a tarlang.
Pu Henry C. Lalrawnkima, Secretary, Mizoram State Sports Council chuan Empowering Mizoram Sports hmachhawp leh hmalak tawh chin te a sawifiah bawk.
Bana Kaih - Empowering Mizoram Sports bultan nan sawrkar chuan Rs. 2.5 crore a dah a, tunah hian naupang theihna nei dap chhuahna hmahruai atan Tuichangral leh Tuipuiral Games huaihawt tan chhoh mek a ni.
EMS hawnna inkhawm hi Pu H. Lalhmingthanga, Director, Sports & Youth Services chuan a kaihruai a, Pu Lalramsanga Sailo, Secretary, Sports & Youth Services chuan kalkhawmte lawmna thu a sawi thung.
He hunah hian Pu Lalbiakzama, Speaker, Pu Lalfamkima, Deputy Speaker, Pu C. Lalsawivunga, Minister, Pu Lalthansanga, Minister, Pu B. Lalchhanzova, Minister of State, Pu Richard Vanlalhmangaiha, MP, Lok Sabha, Pu Lalmuanpuia Punte, Adviser to CM, Er. H. Ginzalal, Adviser to CM leh MLA dang te, official pawimawh tak tak te an tel a ni.
Attachment
Written by: K. Saitluanga, MIS, PIO to Chief Minister
