Aizawl the 24th September 2026: Vawiin khan R. Dengthuama Hall-ah Mizoram Muaythai Association bultuma neih North East Regional Muaythai Championship 2026 kharna inkhawm buatsaih a ni a. Chief Minister Pu Lalduhoma chuan a telpui. Pu Lalmuanpuia Punte, MLA, Adviser to CM, Pu Gavin Miguel Mylliem, MLA, Meghalaya leh Pu Ram Choudhary, General Secretary, United Muaythai Association of India te chu khualzahawm an ni.
Thu sawiin Chief Minister chuan, Muaythai hi kut inthlaka infiamna (contact sports) hlauhawm ber pawl leh tunlai khawvela lar ber pawl a ni a. Olympic Sports Discipline la ni chiah lo mah se eizawnna tlak infiamna a ni tawh a, Mizo tlangval Nazareth Lalthazuala pawhin ONE Championship-ah contract tha tawk tak a nei tawh a ni.
Hetiang lama infiamna hi Mizote khelh chi tak a ni a, Muaythaiah kher lo pawh contact sports dangah India ram aiawhin kan thalaite an feh chhuak reng a, lawmman ropui tak tak an rawn hawn thin a. Theihna kan neihna lama nasa taka kal hi a finthlak a ni.
Chuvang chuan, vawiina lo kal khawm NE fighters te nasa zawkin lo inbuatsaih ula. Sum leh pai lakluhna hnarah leh kan ram leh hnam chawimawi nan lo hmang ang che u. Infiamna hi kan inkara inpawhna tha min thlentu a ni bawk a, he NE Regional Championship pawh hian hmarchhak state hrang hrangte inunauna a tinghet zual dawn a ni, tiin infiammi kalkhawmte chu duhsakna a hlan a ni.
Pu Lalmuanpuia Punte, Adviser to CM pawhin thu sawiin, Muaythai infiamnaah hian Mizoten Foreign-ah medal 16 zet in lo hlawhchhuak tawh a, kan thalaite khelh chi tak a ni tih hi a chiang a. Lo tang sauh sauh ula, hlawhtlinna tam zawk hmuh tumin lo bei zel ula ka duh hle a ni, a ti.
Pu Gavin Miguel Mylliem, MLA - Sohra, Meghalaya leh Pu Ram Choudhary, Secretary General, United Muaythai Association of India pawhin thu a sawi bawk a ni.
He NE Regional Muaythai Championship ah hian India hmarchhak state te an rawn kal kim a, player 350 an fuankhawm a, intihsiakna huang 100 ah inelna an nei a, state lawmman dawn indawt dan chu:
Pakhatna - Mizoram Team
Pahnihna - Meghalaya Team
Pathumna - Tripura Team
Attachment
