Tuidam, 10.01.2023: PMJVK Scheme atanga sum hmuh hmanga Laldenga Synthetic Turf Football Ground (Tuidam) hawnna vawiin khan buatsaih a ni a. Chief Minister Pu Zoramthanga chu khuallian niin a hawng. Sports & Youth Services Minister Pu Robert Romawia Royte chu khualzahawm a ni bawk.
Chief Minister chuan khawthlang lamah development a kal mek a, a kal zel dawn a ni tiin, vawiin football ground changtlung tak hawn a ni chu a lawmpui thu a sawi a. Thalai ten tangkai taka an hman a, nkhelthiam lar, ram pawn thlenga lar ni turin tumruhna nen bei turin a chah a. Footballer lar leh hmingthang kan neihte ang hi an ni ve theih thu sawiin, chuni tur chuan taksa tichhetu zu leh ruihhlo lakah insumin taksa vawng tha turin a chah bawk a. Mi puitling leh hmantlak ni tur chuan thiamna chauh bakah taksa hrisel neih a pawimawh thu a sawi. Pu Zoramthanga chuan Hnam Pa Pu Denga hming chawia Tuidam a football ground a awm chu lawmawm a tih thu a sawi bawk a. India ram mi ngei te zinga Mizoram awmna hrelo an la tamnaah hian hnam thinlung put pawimawh a tih thu a sawi bawk.
Khualzahawm Sports Minister Pu Robert Romawia Romawia chuan Tuidam mipuite a lawmpui thu a sawi a. Vawiina hawn tak synthetic turf football ground hi Tuidam khua tan chauh a nilo a ni, a ti a. A hman dan tur inkaihhruaina te pawh la siam zui a nih tur thu a sawi a. Sports tihchangtlunna turin department hmachhawp engemawzat siam a nih thu sawiin, hall leh astroturf football ground hmun engemawzat a hawn mai tur peih tawh leh peih tep a awm thu a sawi a ni.
Dy. Govt. Chief Whip Pu Lalrintluanga Sailo chuan vawiina CM tawiawmtu MLA te aiawhin thu a sawi bawk a. Sawrkar hmalakna chu lawmawm a tih thu a sawiin, thalaite mamawh hriaa hma a lakna chuan rah tha a chhuah ngei a beisei thu a sawi a. Kum 2020 kum tawp a lungphum phum chu vawiinah a hlawhtlinna hmuh a ni ta chu lawmawm a tih thu sawiin, tangkai taka an hman a duhsak thu a sawi.
Hachhek bialtu MLA Pu Lalrindika Ralte pawhin thu sawiin, vawiinah field changtlung tak pahnih a bial chhunga hawn a nih avangin Hachhek bialin lawmthu an sawi a ni, a ti a. Vawiina hmasawnna ruhrel tha tak din chu a enkawl zuina kawnga mipui mawhphurhna a len thu a sawi a. Thil tha takte hi a hmangtu in a zir loh chuan chhiatna thlentu a ni thei tih hre chungin, vawiina hmasawnna kan hmuh, synthetic turf football ground chu tangkai taka hmangin, mithiam an lo chhuah ngei nan, dimdawi taka hman tangkai ni se a ti a ni.
Home Commissioner Pu H. Lalengmawia leh Pi Lalbiakdiki, w/o Laldenga (L) Ex-CM te hnen atangin thusawi tawi ngaihthlak a ni bawk.
Tuidam a football ground hawnna inkhawm hi Youth Affairs and Tourism Board Vice-Chairman Pu T.C. Pachhunga, Ex-MLA chuan a kaihruai a. Mizoram State Sports Council Secretary Pu John Tanpuia chuan report pe in, Tuidam VCP leh Mizoram Football Association, Mamit District Football Association, Kawrthah GSA aiawhte atangin leh Footballer Jeje Lalpekhlua hnen atangin thusawi tawi ngaihthlak a ni bawk a. Mamit DC leh District Sports Committee Chairman hi bawk Pu Lalnunhlua, Deputy Commissioner chuan lawmthu sawiin hun a khar a ni. Penalty Kick Competition Competition buatsaih a ni bawk.
Vawiin programme-ah hian Horticulture Development Board Vice-Chairman Prof. F. Lalnunmawia, Road and Infrastructure Development Board Vice-Chairman Er. H. Lalzirliana, Manpower Development Board Vice-Chairman Pu Zothantluanga, Commerce & Industrial Development Board Vice Chairman Pu K. Laldawngliana, Adviser to CM pahnih Pu C. Lalramzauva leh Er. (Rtd.) K. Lalsawmvela te, leh sawrkara hotu pawimawh dangte an tel a ni.
REPORT: Laldenga Astro Turf Football Ground, Tuidam, Mamit District siamna tur atan hian kum 2019-2020 khan PMJVK Scheme atangin Rs. 532.50 lakhs hmuh a ni a. He phullem phahna tur lungphum hi 10th December ni 10, 2020 khan Chief Minister Pu Zoramthangan a phum a. Hnathawk tur atan tender chhuah anih hnuin Creative Minds, Chanmari West, Aizawl, Mizoram chu thlan a ni. May ni 10, 2021 khan hnathawh tan niin, August ni 25, 2022 khan zawh fel a ni. He Project hnuai ah hian heng hna hrang hrang te hi thawh a ni :-
1) Football Turf –Synthetic Football Turf phah chin area hi 100.5 x 64 mts. niin, play area hi 95 x 60 mts. a ni. He phullem phahna atan hian New Technology Drain Board System hman niin, a sir kil hnih ah tui paihna tha tak siam a ni. Artificial Grass hi ACT Global Company, USA te siam a ni a, Goal Post leh Net bakah Corner Flag-te pawh dah tel a ni bawk.
2) Gallery - Gallery pahnih (2 nos) 9 x 3 mts. a zau a sak a ni a. Mi 100 vel thu leng thei tura siam a ni.
3) Pavilion for Football Ground -Pavilion awmsa hi chei ?hat a nih bakah, 5.70mx4.00 m a zauh belh a ni a. First Floor-ah hian Dressing Room pathum (3 nos.) leh toilet pahnih (2Nos) te dah a ni a. First Floor hi Pavilion atan a ruahman niin, toilet pahnih (2Nos) dah tel a ni bawk. Mi 60 vel thu leng thei tura siam a ni.
4) Fencing - Playground kual chhuak hian PVC coated chain link Fencing siam a ni a, 2 mts.zel ah ban phun niin, fencing san zawng hi 2.20 mts. a ni a. Main Gate 4mts. a zau siam a ni a. Goal Post hnung zawn ve ve leh pavilion sir tawn ah Emergency Gate 1.2mts. a zau dah tel a ni.
5) PCC Flooring- Gallery leh Fencing inkar bakah, Pavilion leh a chheh vel te PCC flooring tha taka siam a ni bawk.
Attachment
