Dated West Phaileng, the 10th August, 2023: Vawiin khan Chief Minister Pu Zoramthanga chuan West Phailengah Community Service Centre thar leh Residential School Astro Turf thar a hawng.

West Phaileng Bazar Building thar, NEC Fund Rs 300 lakh senga sakna tur hmunhma a en hmasak hnuah Community Service Centre thar hi a hawng a, chumi hnuah Astro Turf thar hi a hawng lehin, Playground thara MLA Cup Tournament a kick-off hnuah heng thil hawn thar pahnihte lawmna inkhawm buatsaih zui a ni.

A hawnna inkhawm Dr. Lalrozama, IAS, Secretary, Sports & Youth Services, kaihhruaiah thusawiin Chief Minister chuan, kum 2020 December thla Covid vanglaia a lung kan phum vawiina a taka kan hawng thei ta hi a lawmawm hle mai. Hripui vang khan hun reilote chhunga kan zawh hman pawh kan beisei ngam lova, nimahsela reilote chhungin tha taka zawh a lo ni ta si hi Pathian malsawmna a ni. In vannei hlein ka hria a, bial nihlawh tak in ni. Hmun hrang hrangah hmasawnna thar hmuh tur a tam hle a, Covid hripui karah pawh heti khawpa nasa hian sawrkarin hna a thawk a ni a, hripui khan min tuam lo phei se chuan hmasawnna hi kan hmu nasa hle dawn tih hi a chiang a ni, a ti. Chief Minister hian West Phaileng bialtu MLA in a bial hmasawn nana a beih nasatzia leh a thawhrimzia a hriatpui thu sawiin, Pathian malsawm tlakin a thawk a, a rah in seng ta a ni, tiin West Phaileng mipuite a lawmpui a ni.

Khualzahawm Pu Robert Romawia Royte, Sports Minister pawhin thusawiin; vawiin hi Sports Minister leh Sports Department te tan ni chhinchhiahtlak a ni. Kan Astro Turf hawn thar hi Mizoram khawthlang lama thalaite leh naupang zawkten hmasawnna kan hmuh theihna tura Residential Sports School changtlung tak lo ding tur zinga hnathawh pakhat mai a la ni a. Hna dang kan thawh mekte kan tihhlawhtlin hunah phei chuan helaiah hian Sports leh School Complex changtlung tak kan nei dawn a, thalaite tana hmasawn zelna tur thil hlu kan nei dawn a ni, tiin hmabak la awm, tuna thawh mekte chanchin a tarlang a. Tangkai taka lo hmang tur leh danin a phal chinah chuan daihzai tak a mamawhtu apiangte lo hmantir thin turin a chah a ni.

Pu Lalrintluanga Sailo, bialtu MLA; Deputy Government Chief Whip pawhin thu a sawi a. Tun hnaiah West Phaileng leh a chhehvel khuain hmasawnna thar kan hmu nasa em em mai a, kan lawm tak zet a ni tiin sawrkar chungah lawmthu a sawi a ni.

A hawnna inkhawm hi Rev. Malsawmsangzuala'n hunserh hmangin Pathian hnenah a hlan a, Pu John Tanpuia, Secretary, MCCS, chuan technical report a pe a, Pu VL Remliana, Deputy Commissioner; Mamit leh Pu Lalchhuanmawia, VCP, West Phaileng te pawhin thusawina hun a hmang bawk.

West Phaileng Residential School sakna atan hian Pradhan Mantri Jan Vikas Karyakram atangin 2019-20 khan sum 3286.34 lakh hmuh a ni a, chu project ken tel vawiina hawn tak Artificial Turf hi Rs. 549.91 lakh hmanga sak a ni. A lung hi dt 15.12.2020 khan Chief Minister hian a lo phum tawh a, hnathawk turin M/s Decor, India, Gauhati te chu thlan an ni. March, 2021 khan thawk tanin kumin July thla khan an zo ta a ni. Phullem phah chin zau zawng hi mtrs 100 a sei, mtrs 60 a zau a ni a, inkhelhna tur bik playground zau zawng hi Mtrs 95 a sei, mtrs 56 a zau a ni. A sirah hian Residential School Academic building te, Administrative building te, Principal Room, Hostel building dangte sak mek an ni bawk. Playground hian Pavilion changtlung tak neiin, a complex hi tha taka hung a ni bawk. Community Service Centre hi PMJVK sum vek Rs. 140 lakh senga sak niin 15th December, 2020 vek khan Chief Minister hian a lung a lo phum tawh a. Centre building hi a dung mtrs 15.70 a sei leh a vang mtrs 8.70 a zau a ni a, ground floor ah Committee room, Office, Library leh Computer room te a awm a, first floor hi multipurpose atana hman theih tura duan a ni.

A hawnna inkhawm hi Pu Lalnunhlua, Director, Sports & Youth Services chuan lawmthu sawiin a khar a ni.

Attachment

Written by: K. Saitluanga, MIS, PIO to Chief Minister