Aizawl the 15^th August, 2024: CK Hyundai Independence Day 9 Ball Pool Championship 2024 chu vawiin khan a hmawr bawk a ni a, Lalsangzela a champion.

Championship kharna leh lawmman semna hun hi Mizoram State Sports Council (MSSC) Sr. SPO Pu Lalrinmawia'n khuallian niin a hmanpui a, Main Sporsor CK Hyundai aṭangin Marketing Manager Laltlanmawia Sailo in a telpui bawk a ni.

Final hi tlai dar 3:00 khan khelh a ni a, Lalrina Renthlei, Tuikhuahtlang leh Lalsangzela, Khatla South ten inkhel hmuhnawm tak an entir.

Lalrina'n frame 3 a zawna a lak hnuin Zela'n frame khat a rawn la a. Rina'n frame khat rawn la lehin, 4 - 1 in Rina'n hma a hruai a, frame an inlak chhawk zak zak hnu leh, Lalrina'n 6 - 3 a hma a hruai hnuah, Zela'n a zawnin frame 5 a la a, 8 - 6 in a chak a, Champion a ni ta a ni.

Semi Finals:

Semi final hi chawhma dar 11 ah khelh ṭan niin, match hmasa zawkah Lalrina Renthlei, Tuikhuahtlang leh T Lalṭanpuia, Upper Republic an inkhel a, Lalrina hi 7 - 1 in a chak.

Lalrina hian frame 6 a zawna a lak hnuah T Laltanpuia'n frame khat a la a, mahse, Lalrina hun a ni miau a, dan theih a ni lo - Lalrina'n frame khat a la leh a, tichuan, frame 7 lain, 7 - 1 in final a inhawlh tling a ni.

Semi Final match hnuhnung zawkah PB Liansangzuala, Dawrpui leh Lalsangzela, Khatla South te an inhmachhawn a. Lalsangzela hian 7 - 4 in PB Liansangzuala hi hnehin final a inhawlh tling a ni.

Lalsangzela leh PB Liansangzuala inkhel hi a hmuhnawm hle a, Zela'n a zawna frame 3 a lak hnuah Pba'n frame khat a la a. 3 - 1 an ni ren rawn a, a hnuah, Zela'n Frame khat a la leh a, 4 - 1 in Zela'n hma a hruai a. Chumi hnuah, PBa'n frame hnih a zawna la lehin, 4 - 3 in Pba'n Zela a um a. Zela'n frame khat a lak leh hnuah, Pba'n frame khat la lehin an inchhawk a, an point hi 5 - 4 a ni a. Chumi hnuah, Zela'n frame hnih a zawnin a la leh a, 7 - 4 in a chak ta a ni.

Quarter Finals:

Mizoram Pool player ṭha 16 thlan chhuahte inlanna CK Hyundai Independence Day 9 Ball Pool Championship 2024 Quarter finals chu nimin khan khelh a ni.

Quarter Finals-ah hian Lalrina Renthlei, Tuikhuahtlang chuan, 6 - 4 in Zonuntluanga, Electric veng chu hnehin Semi Final a inhawlh tling.

Khatla south veng mi ve ve, Lalsangzela leh John Laldinsanga te an inkhel a, 6 - 1 in Zela a chak a, Semi Final a inhawlh tling bawk.

PB Liansangzuala, Dawrpui veng leh T Laltlansanga, Lunglei te an inkhel a, 6 - 2 PB Liansangzuala a chak a, Semi finals a inhawlh tling bawk.

T. Laltanpuia, Upper Republic Veng leh Lalchhandama, Dinthar te an inkhel a, inhnehtawk taka tawk an inchak chhawk zak zak hnuah 5 - 5 niin a tawpah T Laltanpuia vannei zawkah ṭangin 6 - 5 in Semi finals a inhawlh tling bawk a ni.

Quarter Finals hi race to 6 a khelh a ni a, Semi Final hi Race to 7 a khelh niin, Final hi Race to 8 a khelh a ni  bawk.

CK HYUNDAI Independence Day 9 Ball Pool Championship 2024, hi Mizoram Snooker & Billiards Association (MSBA) buatsaih niin, August 13 aṭang khan Millennium Centre Atrium-ah khelh a ni a.  CK Hyundai chu main sponsor niin, Co-sponsor te chu Mahindra Tractors, Cafe Desire, Mualhawih Picnic Spot, Pepperfry Bawngkawn, Marlboro te an ni a. He Championship hi Explore Mizoram Youtube channel-ah live a pekchhuah a ni.

Attachment