Mizoram State Sports Council, Government of Mizoram, India

Chief Minister in Lawngtlai district a Sports & Youth Development Project 14 khuhhawnna a nei

No.6479/2020-2021

Aizawl the 9th November, 2020: Chief Minister Pu Zoramthanga chuan vawiin khan Sports and Youth Services Department hnuaia Lawngtlai district a hmalakna thar 14 khuhhawnna a nei. Sports & Youth Services Department leh Mizoram State Sports Council ten Pradhan Mantri Jan Vikas Karyakram (PMJVK) hnuaia sum hmuh atanga project hrang hrang (project zawng zawng belhkhawm Rs. 12,044.20 lakhs) khuhhawnna programme hi Video Conference kaltlangin CM Cabinet meeting room leh Lawngtlai DC Conference Hall thlungzawm a neih a ni a. Chief Minister chu khuallian niin, Sports Minister Pu Robert Romawia Royte chu khualzahawm a ni a, Lawngtlai East bialtu MLA Pu. H. Biakzauva chu Host a ni a. Lawngtlai atangin DC Dr. Andrew H. Vanlaldika hovin district hotu dangte an tel bawk.

Chief Minister Pu Zoramthanga chuan thalaite tana infiamna lama hmasawnna tur hmalakna thar pui tham tak bultan a ni chu lawmawm tiin, tangkai taka hman a nih theih nan puitlin ngei a nih theih nan a duhsakna a hlan. Sawrkarin mipui hmasawnna tura hmalakna hrang hrang a siam te hi a nih ang tur taka puitlin tur chuan mipui tawiawmna leh thlawp puina a pawimawh thu Chief Minister hian a sawi a. Khawtlang leh ram pum tan a ni tih hre chungin sawrkar chauh nilovin, mimal leh tlawmngai pawl leh pawl dang dangte thawhhona leh inlungrualna a pawimawh thu a sawi a ni. Chief Minister chuan Mizoram chhim lam chu state hmasawnna atana prospect nei tha, agriculture leh horticulture lamah te, inkalpawhna kawng leh waterway te leh thil dang dangah a neih thu a sawi a. Tun tumah infiamna lama hmasawnna ruhrel din tur pawh Lawngtlai district leh Zoram pum tana chhawr tlak a nih thei a beisei thu a sawi.

Chief Minister chuan COVID-19 hrileng avangin Lawngtlaiah a hmunah ngei programme hmang thei lovin, virtual unveiling neih a ngaih tak thu a sawi a. Hun khirh tak kan ramin kan tawn mek hi engtin nge kan hmachhawn dan azirin thangthar lo kal zel leh tur atan entawn tlak kan nih leh nih loh a hril tur thu a sawi a. Tangrual takin theihtawp chhuahin midang tana entawn tlakin kan theih ang ang kan thawk zel tur a ni a ti. Chief Minister chuan tuna sports development atana sawrkar laipui atanga sum hmuh hi state in mamawhna dang a neih atana hman theih nilo, a hman na tur bikah chauh hman theih a nih thu a sawi bawk.

Khual zahawm Sports Minister chuan "Covid hripui avanga sum leh pai harsatna kan tawh mek lai hian Mizoram Budget-a kan sum neihsa nilo kan State budget pawnlam atanga sum hmuh tam a pawimawh a, Zoram sorkarin sum lama harsatna a tawh lai hian kan Budget eihek lova State pawn atanga hmasawnna sum kan hmuhte hi hman zung zung a tul a ni", a ti a. Pu Robert Romawia Royte chuan Sports Department sum hmuh pawh thil dang atana hman theih a nih loh avangin an sanction na ang ngeia hman ran a, Installment hnuh luh leh zung zung chu state sum harsatna phuhruk nan leh hmasawnna a taka a thlen nan thil tul a nih thu a sawi.

He hun hi Sports Department Secretary Pu H. Lalengmawia chuan a kaihruai a. MSSC Secretary Pu John Tanpuia hnen atangin Technical Report ngaihthlak niin, Lawngtlai district a project lungphum phumna hi CM aiawhin Lawngtlai DC chuan a phum sak a. Pu H. Biakzaua, MLA chuan lawmthu sawiin hun a khar a ni. He hunah hian Sports, Youth Affairs and Tourism Board Vice Chairman Pu T.C. Pachhunga leh Sport Department hotu dangte, Lawngtlai district officer thenkhat leh khawtlang hruaitute an tel a ni.

Lawngtlai district-a PMJVK hnuaia sports tihhmasawnna tura hmalakna thar tur te chu hengte hi a ni:

1. Lawngtlai District Sports Complex : Lawngtlai-IV-ah District Sports Complex din tum a ni a. Hemi atan hian Rs. 5019.43 lakhs pawh pawm fel a ni tawh.

2. Lawngtlai Residential Sports School : Lawngtlai district-a thalai infiammite chawikan nan leh mu mal zawka Sports lama hma kan sawnna turin College Vengah Lawngtlai Residential Sports School, Rs. 3,461.70 lakh senga din tum a ni a, 1st installment atan Rs. 1557.765 lakhs pawh released tawh a ni.

3. Lawngtlai Govt. College Hostel: Govt. Lawngtlai College-ah khual khua atang leh Lawngtlai khawpui chhung atanga mamawhte tan chenna tur Hostel changtlung tak sak tum a ni a. He Hostel sakna atan hian Rs 282.80 lakhs sanction tawh a ni.

4. Lawngtlai Community Centre: Lawngtlai Tourist Lodge bulah mipuite mamawh hrang hranga hman tangkai theih turin Lawngtlai Community Centre Rs 260.00 lakhs senga din tur niin, sanction tihfel tawh a ni a, 1st installment pawh department kutah a awm tawh a ni. Hei hi Tourism Department kuta awm tur a ni.

5. Astro Turf Football Ground: Lawngtlai Vengpui Football Ground tihchangtlun na, Phullem (AstroTurf) phah nan Rs. 1,005.34 lakhs tihfel a ni.

6. Basketball Court 5 siamna tur Rs. 542.6 lakhs leh Volleyball Court 5 siamna tur Rs. 164.06 lakhs pawh sanction tih fel tawh a ni bawk.

7. Heng bakah hian Chawngte a Girls Hostel sakna tur Rs. 282.80 lakhs leh Bungtlang South-a Community Service Centre sakna tur Rs. 140.00 lakhs pawh tihfel tawh a ni.

8. Smart Class Room : Information & Communication Technology Department hnuaiah Smart Class Room engemaw zat siamna tur Sum pawh hmuh a ni tawh.

9. IT Education hnuaiah Central Sorkar projects kaltlangin School engemaw zat hnenah Computer thahnem tak pek tawh niin, pek lehna tur sum pawh hmuh a ni leh tawh a, tihfel leh thuai tum a ni.

10. Chawngte Astro Turf Football Ground siamna tur pawh Rs 532.47 lakhs sanction fel tawh a ni a, hna tan thuai tum a ni.

Heng Projects te hi Chief Minister Pu Zoramthanga ruahmanpuinain DC&MA Minister Pu R. Lalzirliana leh bialtu MLA Pu H. Biakzauva te nen inrawn chung zela siam a ni a. Heng project atang hian Sorkarin Tax leh Cess tam tak a dawng dawn a, mi tam takin eizawnna an neih dawn bakah kan ram mamawh em em thalaite tan infrastructure tha Lawngtlai District-ah a awm dawn a ni.

List of new Projects Approved by Central Government to be executed by Sports & Youth Services Department, Govt. of Mizoram within Lawngtlai District

Name of Projects and Amounts

1. Lawngtlai District Sports Complex - Rs.5019.43 lakhs

2. Lawngtlai Residential Sports School - Rs.3461.70 lakhs

3. Lawngtlai Govt. College Hostel - Rs.282.80 lakhs

4. Lawngtlai Community Centre - Rs.260.00 lakhs

5. Astro Turf Football Ground - Rs.1005.34 lakhs

6. Basketball Court 5 siamna tur - Rs.542.60 lakhs

7. Volleyball Court 5 siamna tur - Rs.164.06 lakhs

8. Girls Hostel at Chawngte - Rs.282.80 lakhs

9. Community Service Centre at Bungtlang S - Rs.140.00 lakhs

10. Community Service Centre at Chawngte - Rs.140.00 lakhs