No.7068/2020-2021
Aizawl the 7th January, 2021: Vawiin khan Mizoram Deputy Chief Minister Pu Tawnluia chuan Aizawl Indoor Stadium, Republic Vengthlanga sak tur lungphum a phum. He hunah hian Sports Minister Pu Robert Romawia Royte chu khual zahawm a ni a, Rajya Sabha MP Pu K.Vanlalvena leh MLA Er. H.Lalzirliana te chu special guest an ni.
Pu Tawnluia chuan Mizoram leh Mizo thalaite sports lama hma an sawnna tura sawrkar hmalakna hrang hrang sawiin a department chan UD&PA leh Sports chu department inhnimhnai tak, hmalakna nasa tak nei chho mek an nih thu a sawi a. Aizawl Smart City Project, UD&PA Department hnuaiah Durtlang Football Field chu Mizoram football ground lian berah siam tum a ni a; Zemabawk field leh Chite field te tihlen tum a ni a; Hlimen, Edenthar, Tuivamit ah te football field siam tum a ni a; Zuangtuiah Badminton Hall, Zemabawkah Futsal Ground, Chaltlangah Indoor Hall sak tum a ni a; thalaite tan Music City siam tum a nih thu a sawi bawk. Deputy Chief Minister chuan thalaite tana sawrkar hmalakna a nasa hle a, vawiina stadium sakna tur lungphum phum tak pawh hi kan la neih ngai loh nei tura hmathar lakna a ni a, Mizoram pumpui hmasawnna tura hmalakna ropui tak a nih kan ring, a ti a. A veng neitu leh ram mipuiten tangkai taka an chhawr theih tura sak puitlin a nih theih nan Deputy Chief Minister Pu Tawnluia chuan duhsakna a hlan a ni.
Pu Robert Romawia Royte chuan volleyball khelhna atana hman tur Indoor Stadium sakna tur lungphum phum a ni ta chu lawmawm a tih thu sawiin volleyball chu Olympic-ah pawh game pawimawh tak, Mizo thalaite khelh nasat tak niin national level tournament te pawh thlen theihna turin Aizawl City Indoor Stadium chu buatsaih a ni dawn, a ti. He stadium hi changkang takin International standard mila sak tura duan a ni, Sports Minister chuan a ti a. Volleyball nilo sports discipline dang te pawhin state level championship buatsaih nana an hman theih tur thu a sawi bawk. Sports infrastructure Mizoram dung leh vanga din chhoh mek a ni hi thawhhohna tha leh tan tlanna vang a ni, a ti bawk.
Special Guest pahnih Rajya Sabha MP Pu K.Vanlalvena leh MLA Er. H.Lalzirliana te pawhin thu sawiin sports hmasawnna tura sawrkar hmalakna leh hmasawnna hna thawh mek te chhuanawm an tih thu an sawi.
Aizawl Indoor Stadium, Republic Vengthlanga sakna tur atan hian cheng nuai 763.45 ruahman a ni a. Ministry of Youth Affairs & Sports, Government of India hnuaia Khelo India Scheme atanga sak tur niin tunah hian Administrive Approval cheng nuai 450 dawn tawh a ni.
Multipurpose Hall sak tur ground floor-ah hian 4-wheeler lirthei 16 leh 2-wheeler 35 dah theihna tur parking siam a ni ang a. Market shed bakah security cabin, toilet (12) leh zun in (15) te dah a ni bawk ang. First floor-ah volleyball court pakhat dah a ni anga, mi 242 lenna tur gallery a awm anga, player room, toilet (4), official room leh medical room te dah a ni ang.
Programme hi Sports Secretary Pu H.Lalengmawia’n a kaihruai a. Mizoram State Sports Council Secretary Pu John Tanpuia’n technical report a pe a. Republic Vengthlang Local Council Chairman Pu Vanlalhruaia’n thu tawi a sawi a. Sports Department Director Pu Lalsangliana’n lawmthu sawiin hun hnung a khar a ni.
Attachment
Written by: Lalnunmawii, MIS, IPRO
