Dated Hnahthial, the 6th November, 2024: Vawiin khan Hnahthial DC Meeting Hall-ah Bawrhsap leh District Sports Committee (DSC) Chairman ni bawk, Pi Rita Lalnunmawii Pachuau kaihhruaiin Hnahthial DSC hruaitu turte thlanna hun neih a ni.
He hunah hian Mizoram State Sports Council thuchhuah angin Hnahthial DSC hruaitu tur pathum - Sr. Vice Chairman, Vice Chairman leh Assistant Secretary te chu Addl DC leh RO ni bawk, Pu Zothanmawia Khiangte kaihhruaiin thlanna neih a ni a. Sr. Vice Chairman atan hian Pu F. Zosangliana, Hnahthial District Tug of War Association President chu thlan tlin niin Vice Chairman atan Pu C. Lalramdinsanga, Hnahthial District Aquatics Association President chu thlan tlin a ni a. Assistant Secretary atan hian Pu V. Zairemthanga, Hnahthial District Karate Association President chu thlan tlin a ni bawk a ni. HDSC Secretary nihna hi District Sports & Youths Officer (DSYO) leh SDC ni bawk, Pu R. Vanlalruata'n a chelh mek a ni.
Thlan tlin takte hian rawlkhawlhna a awm loh chuan an nihna hi kum 2 chhung an chelh ang.
Bawrhsap chuan inthlanna felfai tak neih theih a ni chu lawmawm a tih thu sawiin thlan tlin takte chu Hnahthial District Sports chawikang tura theihtawp chhuah turin a sawm a. Hnahthial Sports Association zawng zawng aiawh leh an hmel lanna an nihna hre reng chungin an nihna chu chelh tura a duh thu a sawi bawk a ni.
Inthlanna neih zawh takah hian Pu Hmingmawizuala, DUDO/BDO; Pu R. Vanlalruata, SDC/DYSO; Pu F. Lalrinfela, DIPRO; PWD leh PHE aiawhte bakah Hnahthial District Badminton, Tug of war, Karate, Carrom, Snooker, Rifle, Volleyball, Chess, Bodybuilding, Boxing leh Aquatics Association hruaitute an tel a ni.
Attachment
Written by: F Lalrinfela, MIS, DIPRO - HNAHTHIAL
