No.3266/2021-2022
Aizawl the 3rd December, 2021: Nimin khan Hnahthial khawpuia Astroturf Football Ground siam zawh thar chu a bialtu MLA leh Minister ni bawk Dr. R. Lalthangliana chu Khuallian niin Field thar hi a hawng a. He hunah hian Sports Minister Pu Robert Romawia Royte chu Khualzahawm a ni.
Hawnna thusawitu Health Minister Dr. R. Lalthangliana chuan Hnahthial Field sak chu kum 2018-ah NEC-in a scheme tihdanglam vangin a titawp a. Mahse Sports Minister Pu Robert Romawia Royte-in thiam taka a nawrna avangin kum khat chawlh a nih hnuah ni 29 October 2019-ah sanction thar leh a ni a, Sports Minister-in a nawr chhuak leh thei kha a ropui hle a ni a ti a, Hnahthial leh Hnahthial bial mipuite aiawhin lawmthu a sawi bawk a ni. Khuallian chuan Hnahthial bial chu infiam mi tamna bial, Mizoramin kan chhuan em emte pawh an chawrchhuahna a ni a ti a, Hnahthial district Headquarters-in Tourism ruhrel tha a mamawh thute sawiin Tourism Minister Pu Robert Romawia Royte chu hma la turin a ngen bawk a ni. Minister Dr. R. Lalthangliana chuan sorkarin sports chu industry-a a puan tawh thute sawiin nasa zawka sorkarin tan a lak zel tur thute a sawi bawk.
Khualzahawm Sports Minister Pu Robert Romawia Royte pawhin thusawiin Hnahthial Football Ground siam hna chu Sorkar hmasa hun laia tan a nih thusawiin Sports Minister hmasa Pu Zodintluanga Ralte-in bul a lo tan chu fakawm a ti a. NEC scheme tihdanglam avangin May 2018-ah sum titawpin hna an chawlhsan lo thei lova, sanction thar leh turin theihtawp sawrkarin theihtawp chhuahin, kum khat chuang chawlhsan tawh chu ni 21 October, 2019-ah khan chhunzawmna tur sanction kan hmu leh ta chu a lawm hle a ni a ti. Minister chuan Hnahthial leh a chhehvel chu infiam mi hlawhtling tamna a ni a, sports facilities tha pawh an phu a, sorkarin a ngaihtuah zel ang a ti bawk ang tiin a sawi.
He hunah hian Jeje Lalpekhlua Footballer pawhin lawmthu a sawi a, Pu F. Laldinthara pawhin VC leh Hnahthial DFA aiawhin lawmthu a sawi bawk a ni.
He Field-ah hian a dung 110 Metre, a vang 75 Metre-ah phullem phah niin, a inkhelhna lai tur Play Area hi a dung 105 sq metre leh a vang 69 sq metre-a zau a ni.
He Hawnna Inkhawm hi Pu F. Lalrinawma, Additional Secretary Sports Department-in kaihruaiin Pu John Tanpuia, Secretary, MSSC-in Technical Report a pe a, Hnahthial DC Pu R. Lalremsanga'n lawmthu sawiin inkhawm a tin a ni. Field thar lawm nan Hnahthial DFA Veterans te leh Lunglei DFA Vererans te an inkhelh bakah Hnahthial 11 leh Tata Trust CoE ten exhibition match an khel bawk.
Hemi ni vek hian Dr R. Lalthangliana South Tuipui bialtu MLA & Health Minister ni bawk chuan Hnahthial khawpui chhung Rallang Tlanga Cheng Nuai 70 senga sak tur District Urban Development Office sakna tur Lungphum a phum nghal bawk a ni.
Attachment
Edited by: Dr. Saithantluangi Zote, MIS, IPRO
