Trivandrum, the 30^th April, 2025: India rama hockey thuneitu sang ber Hockey India, Associate Joint Secretary atan, Hockey Mizoram General Secretary tanglai Lalrinfela chu ruat thar a ni.

Hockey India Executive Board Meeting chu Hotel Karthika Park, Kerela-ah neih niin, hemi ah hian Pu Rinfela hi ruat a ni.

Hockey Mizoram chuan thuchhuah siamin, "Pu Lalrinfela kan chhuang che in kan lawmpui tak meuh meuh a che, i kalna zel turah leh pawl min hruai zelna turah Pathianin finna tha leh zualin thuam chak zel che rawh se.

"Hemi rahbi kaichho thei tura theihtawp chhuahtute; a bik takin player zawng zawng te chungah Hockey Mizoram chuan lawmthu a sawi tak meuh meuh a, chung ho lo tuaihriam a lo chher chheltu an coach te zawng zawng zahna chibai kan buk e." an ti.

Pu Lalrinfela hi 2014-2017 chhung khan Mizoram State Sports Council-ah Joint Secretary atan thlan a lo ni tawh bawk a ni. 

Mizoram State Sports Council chuan Pu Lalrinfela a lawmpuiin duhsakna a hlan a, Mizo Hockey player te tan hmasawnna nasa zawk a thlen ngei a beisei bawk a ni.

Attachment