Lawngtlai, 13th March 2026: Vawiin khan Home Minister Pu K. Sapdanga chuan Khuallian niin Residential School, Lawngtlai; Sadbhav Mandap, Chawnhu; Girls' Hostel, Lawngtlai leh Chawngte te chu a rualin Residential School, College Veng, Lawngtlaiah a hawng. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA ni bawk leh Pu C. Ngunlianchunga, Lawngtlai West bialtu MLA te chuan Khualzahawm ni a hmanpuiin, Pu Donny Lalruatsanga, Lawngtlai Bawrhsap chuan hun a kaihruai.
Pu K. Sapdanga chuan Lawngtlai District mipuite leh a mamawhtuten tangkai leh hlawk taka an hman tura Residential School, Lawngtlai; Sadbhav Mandap, Chawnhu leh Girls' Hostel, Lawngtlai leh Chawngte te chu a hawn thu a sawi a. Hmasawnna ruhrel tha tak tak hawnte tangkai tak hmang turin Lawngtlai mipuite a chah. Mizoram Sawrkarin LADC kutah phal taka a pek thu tarlangin, a enkawl kawngah thahnem ngai taka thawk turin a chah a ni. Residential School chuan infiammite tan chona thar a pek ngei a beisei tih sawiin, eizawnna tlaka hman a nih a beisei thu a tarlang a ni.
Khuallian chuan thalaiten tih takzet leh rual elna nei chunga ke an pen a hun tawh hle tih a sawi a. Mizoram tihmingthatu ni turin thalaite an pawimawh hle a, eng hna pawh thawk ila, rinawmna leh taihmakna nen neih fan fan a hun tawh hle nia a hriat thu a sawi. Chhim lam chu Mizoram kawtchhuah a ni tan mek tih tarlangin, hemi kawngah pawh lo inbuatsaih that a tul hle a, a bik takin Lawngtlai mipuiten tih tur an ngah hle a, theihtawp chhuah turin a fuih a ni. Ram leh hnamah chian a pawimawh hle tih tarlangin, hnam ziarâng chawikan kawngah I harh thar ang u tiin a sawm a. LADC-ah sawrkar ngelnghet tak a awm a pawimawh hle a, chu chu mipuite duhdan pawh a ni tiin, chak taka LADC kal zel a beisei thu a sawi a, Mizoram sawrkar nen chak zawka thawk tlang zel turin duhsakna a hlan nghal bawk.
Khualzahawm Dr. Lorrain Lalpekliana Chinzah, Adviser to Chief Minister chuan Lawngtlai District - mipuite tana hmasawnna ruhrel lian tak peihfel a ni chu lawmawm a tih thu a sawi a. A hman tangkai leh enkawl kawngah erawh rilru sen a ngai dawn hle a, duat leh uluk taka enkawl leh hman tangkai a tul dawn hle a ni, a ti. LADC hotute mawhphurhna pawh a sang dawn hle tih tarlangin, theihtawp chhuahho turin LADC, VC leh NGO te a sawm a ni. Residential School chuan Infiammite tan bungthar a thlen tur thu sawiin, Girl's Hostel leh Sadbhav Mandap te pawhin rah tha a chhuah ngei a beisei tih a sawi.
Khualzahawm Pu C. Ngunlianchunga, Lawngtlai West bialtu MLA chuan a bial chhunga hmasawnna ruhrel tha tak a awm chu lawmawm a tih thu a sawi a. LADC ngeiin a enkawl chhunzawm tir chu ropui a tih thu tarlangin, tha leh uluk taka enkawl a pawimawh hle a ni, a ti. Neitu thinlung put pawimawhna sawiin, MLA chuan Lawngtlai mipuite neitu diktak an nihna hriaa duat taka enkawl turin a sawm a ni.
Pu C. Lalsawmzuala, CEM, LADC, chuan Residential School, Lawngtlai, LADC kutah hlan a ni chu ropui a tih thu sawiin, Mizoram Sawrkar leh Mizoram State Sports Council (MSSC) chungah lawmthu a sawi a. Lawngtlai mipuite an ngaihven kawngah hlu a tih thu tarlangin, Laifate tan ni chhinchhiah tlak tak a ni, a ti a. A enkawl kawngah LADC chuan theihtawp a chhuah tur thu a sawi a ni.
Pu James Lalramnghaka, Asst. Engineer, Mizoram State Sports Council chuan Technical Report a pe a. Residential School, Lawngtlai hi Ministry of Minority Affairs hnuaia PMJVK Scheme 2019-2020 atanga cheng nuai 3461.70 hmuh niin Work order amount chu Rs. 3149.84 lakhs a ni a.Contractor hi DJ Consultancy Services, Mission Veng, Aizawl, Decor India, Guwahati, Assam te niin March 8, 2021 khan hnathawh tan a ni a, September 8, 2025 khan zawhfel a ni. Residential School ah hian Academic Building, Boy's Hostel, Girl's Hostel, Principal Quarter, Teachers/ Staff quarter, Multipurpose Hall, Artificial Turf Football Ground-te a awm a ni. Sadbhav Mandap, Lawngtlai sak nan hian Ministry of Minority Affairs hnuaia PMJVK Scheme 2018-2019 atangin cheng nuai 236.0O hmuh a ni a, Work order amount chu Rs. 214.74 lakhs a ni. M/s Excell Consultancy Services, Mission Veng, Aizawl ten hna hi an thawk a December 19, 2021 khan tan niin February 15, 2024 khan zawhfel a ni. Girl's Hostel Lawngtlai, sak nan Ministry of Minority Affairs hnuaia PMJVK Scheme 2019-2020 atangin cheng nuai 3461.70 hmuh a ni. Work order amount Rs. 257.32 lakhs a ni a. July 22, 2022 khan hna thawk tanin November 30, 2025 khan zawhfel a ni. Girl's Hostel, Chawngte work amount Rs. 257.32 lakhs niin, M/s Excell Consultancy Services, Mission Veng, Aizawl ten an thawk a. July 21, 2022 a hna tan chu January 30, 2026 khan zawk fel a ni.
Home Minister hian Residential School chu LADC hnenah hlan nghalin, Girl's Hostel Lawngtlai, hi Govt. Lawngtlai College hnenah hlan a ni a, Girl's Hostel Chawngte chu Govt. Chawngte College hnenah hlan niin Sadbhav Mandap chu 'Management Board' kutah hlan a ni bawk.
Vawiin hun hmannah hian Mizoram sawrkar leh LADC Official-te leh Sports Discipline hrang hrang hruaitute an an tel tha hle a, Pu K. Lalthanzara, Executive Secretary, LADC chuan lawmthu sawina neiin hun a khar a ni.
Attachement
Written by: Zonunchama Ralte, MIS, DIPRO - LAWNGTLAI
