Aizawl, the 29th September 2022 : Vawiin khan Information & Public Relations changtu Minister Pu Lalruatkima’n Aizawl West Joint YMA Hall-ah Mizoram Table Tennis Association (MTTA) in Mizoram State Sports Council puihnaa buatsaih Table Tennis inelna Mizoram Ranking Table Tennis Championship 2022 a hawng.

Pu Lalruatkima chuan tunhnaia Mizo thalai ten ramchhung Table Tennis inelna hrang hranga an hlawhtlinna leh Medal an hawn chanchin te sawiin Mizo ten Table Tennis kan hmelhriatna a la rei lo ngaihtuahin Table Tennis-ah Mizo thalai te hlawhtling tak tak awmin Medal te hawnin Mizoram leh India tihmingthatu an ni mek a. Hei hi Association hruaitute thawhrimna leh inpekna avang leh TT players te thahnemngaihna leh tumruhna avangin a ni, a ti. Table Tennis thiam Jeho Himnakulhpuingheta hlawhtlinna chanchin te sawiin hetiang inelna buatsaih atangin Jeho te ang thalai te talent kan haichhuak thei a, chumi atan chuan Tournament leh Championship neih te hi thil tul tak a ni, a ti.

Mizoram Sawrkarin infiamna chu a ngaihpawimawh thu sawiin infiammite hamthatna leh mumal zawka Association te inkaihhruai nan Mizoram Sports Policy tha tak kan nei a, hemi hmangin Sawrkarin infiamna leh infiammite hmasawnna ngaihtuahin hma a la zel dawn a ni, a ti. Infiamna leh lehkha zir chu a kalkawp thei rualin hlawhtling tur chuan mi aia pen tam, mi aia thawhrim te a ngai a, tunalaiah infiamnaa eizawnna leh hmingthatna tam tak awm tawh mahse rinawmna, taimakna leh insumtheihna hmangin hlawhchhuah a ngai tiin he ranking a tel infiammite a fuih a ni.

Mizoram Ranking Table Tennis Championship 2022 hi vawiin atanga tanin October ni 1 thleng a awh dawn a. He inelnaah hian Category hrang hrang 13 siam niin TT players mi 135 an tel a. Anni hi Association 2 leh Club 15 atanga lo tel te an ni. Aizawl District bakah District dang 4 atangin infiammi an tel bawk a ni.

MTTA hruaitute chuan Minister-in he Tournament buatsaih nana TT Board 2 an mamawh a leisak avangin lawmthu an sawi a ni.


Attachment


Written by: Pratap Chhetri, MIS, Deputy Director