No.2099/2021-2022
Aizawl, the 2nd September, 2021: Sports & Youth Services Department buatsaihin vawiin khan Aijal Club-ah infiammi thlan bik mi 2005 te hnenah Incentive Cash Award hlanna buatsaih a ni a. Chief Minister Pu Zoramthanga chu he hunah hian khuallian niin, Speaker Pu Lalrinliana Sailo chu khualzahawm a ni a, Sports Minister Pu Robert Romawia Royte chu thlengtu a ni.
Chief Minister chuan sports lama hmasawnna hi hnam changkanna tehfung pakhat a nih thu a sawi a. Pianphung a chak leh thei hrim hrim chu awm mahse ram leh hnam changkanna lantirtu pakhat a nih thu a sawi. Mihring inkarah inkawmngeihna boruak siamtu, taksa hriselna thlentu a nih bakah ram leh ram inkara inelna te hian innelna a siam thu sawiin, sports hian inpumkhatna tha tak a siam thu a sawi a. Infimmi te chu zuk leh hmuan leh ruihtheithil laka fihlim a pawimawh thu a sawi bawk. Chief Minister chuan mitin te an theih chin chinah taksa insawizawi thin chu tul a tih thu a sawi. Sports lama hmasawnna ruhrel siama hmalakna kal mek engemaw zat a awm thu sawiin Chief Minister chuan COVID-19 hrileng in min tibuai mahse a tih theih chin chinah theihtawp chhuahin kan bei a ni, a ti.
Speaker Pu Lalrinliana Sailo chuan infiammi te tiphur tura cash award sawrkarin a ruahman chu tha a tih thu sawiin, acts leh rules te chu a taka kalpui zuina a awm loh chuan awmzia a awmloh thin thu leh, vawiina dan siam sa anga incentive cash award sem a ni chu lawmawm a tih thu a sawi a. Sports Department leh infiammi te chu kum 2024 Paris Olympics lo awm tur chu thlir ran a, Mizoram atanga tel ve thei kan awm ngei nan chona ah la turin a chah a ni.
Sports Minister Pu Robert Romawia Royte chuan vawiina incentive cash award sem dan chungchang a sawi a. Dan (rules) awm sa zulzuiin competition level hrang hrang azirin award in a ken pawisafai zat pawh a danglam ve zel thu a sawi a. Tun tumah hian kum 2008 atanga inelnaa tel tawh te a huam tel chhan chu, a hma kumah sem lo ni tawh thin mahse, rules anga award dawng thei zingah chhan hrang hrang avanga dawng velo leh lo dil lo te an awm avangin, tunah hian an tan hun siam lehin cover period tih zau a nih thu a sawi.
Vawiin incentive cash award sem dan chu hetiang hi a ni:
1) Total number of athletes:
2008-2019: 411
2018-2019: 1075
2019-2020: 519
Total: 2005
2) Amount Sanctioned:
2008-2019: Rs. 37,10,350/-
2018-2019: Rs 48,09,800/-
2019-2020: Rs 35,67,300/-
Total: Rs 120,87,450/-
Dawng hnem zual (pathum na thleng tarlan a ni):
a) Jeremy Lalrinnunga, Weight Lifting: Rs. 4,25,000/-
b) Jeje Lalpekhlua, Football: Rs. 1,80,000/-
c) H. Lalruatfeli, Hockey: Rs. 1,61,000/-
Incentive cash award hian competition pawimawh zawng zawng a huam vek thei lo a, Youth Olympic, Khelo India te pawh kan la huamtir lo a, Incentive award rules 2008 in a huam leh phalsak bak application tam tak a awm a. Incentive cash award rules-ah hian Minister SYS Deptt chair na hnuaiah Committee sang siam niin, Fianance department leh Law department lam pawh telin he committee phalna anga zirin award hi sem a ni a. Tun tumah hian Olympic, Asian Games, Commonwealth Games atanga North East level thleng a tehfungah hman niin, a huam chiah loh te pawh an dawn tur ang siam sak anni a. International tih hming pu tournament invitation ni mahse a competition level a san loh chuan dah hniam an nih thu report-ah tarlan ni.
Vawiin lawmpuina semna inkhawm hi Sports & Youth Services Commissioner & Secretary Pu H. Lalengmawia chuan kaihruaiin, Pu Vanlalrova Ralte, Deputy Director, SYS hnen atangin report ngaihthlak a ni a. Pu F. Lalrinawma, Addl. Secretary, SYS chuan lawmthu sawiin hun a khar a ni. Vawiin hian lawmman hi mimal tlem te bakah Sports discipline hrang hranga an aiawhte hnenah hlan a ni.
Written by: Emily Lalrinpuii, MIS, PIO to Chief Minister
