E. Lungdar the 1st April 2025: Vawiin khan E. Lungdar Mini Sports Complex-ah Pu Lalduhoma, Chief Minister chuan Tuichangral Championship 2025 a hawng a. Infiammite chu chak tuma theihtawp chhuaha bei thin, chak loh pawh thiam, beidawng ve ngai si ni turin a chah. A hawnna inkhawmah hian Pu Lalnghinglova Hmar, Sports Minister chu khualzahawm a ni.
Thu a sawinaah Chief chuan, kum 1970 chho atanga lo kalpui tan tawh he intihsiakna hian ngaihhlut a hlawh thin a, Tuichangral Games tiin kan hria a, Mizoram a deng chhuak thin. Infiamna ngaina tak in nih avangin infiammite pawhin an chhawr a. Mizoramin Olympian pahnih chauh kan la nei a, chu ta pakhat zawk chu E. Lungdar chhuak, C. Lalremsanga, Archer a ni. Tun hnaiah professional footballer engemawzat in chher chhuak tawh bawk.
Infiamna tam tak hi eizawnna tlak a nih tawh avangin a bei tak takte tan chuan hlawhtlin theihna leh ram leh hnam chawimawina a ni a. Vawiina intihsiakna bei tura lo kal te zingah pawh, talent nei tha, tih tak taka beitu tam tak in awmin ka ring. Theihtawp chhuahin, hlawhtlin ngei tumin bei ang che u.
Ka sawrkar hian kan naupang talent nei tha te zawn chhuah a, training tha tak pea, Olympic 2036 a India aiawh thei khawpa buatsaih kan tum a. Kumin Tuichangral Championship pawh hi naupang talent zawn nan kan hmang dawn a ni.
Tin, kan thalai tam takte ruihhlo vangin an thi zawih zawih a, nangni Tuichangral thalaite erawh hi chu heng nun kawng dik lo lakah hian lo fihlim ula, zuk leh hmuam leh ruihhlo tih ai chuan infiamna lamah in hunawlte lo hmang zawk ula, in rilru leh taksa tan a that bakah ram tan pawh a tha a ni.
Infiamna hian chak zawk nih dan te, chak lo zawk nih dan te pawh min zirtir a. Chu chu kan nitin nuna thil thleng thin, kan dawnsawn thiam ngai tak a ni. Mi tam tak chuan chak lo zawk nih an thiam lo va, hlawhchham te hi an hlau va, an beidawng mai thin. Mihringte hi kan thil tih tinrengah kan hlawhtling vek thei bik lo, kan hlawhchham chang pawh a awm. Chu chu kan pawm thiam a ngai a, kan zir a ngai a ni. Intihsiakna beitute zawng zawng duhsakna ka hlan a, chak tuma bei, chak loh pawh thiam, beidawng ngai lo, lo ni theuh ang che u, tiin a chah.
Pu Lalnghinglova Hmar, Minister, Sports & Youth Services pawhin thusawiin, Tuichangral thalaite tana entawn tur, kum li chhunga E. Lungdar atanga Barcelona Olympic-a India aiawha inlan phak, Mizo Olympian hmasa ber C. Lalremsanga neitu in ni a. He bialah hian talent a awm tih kan hria a, kan rawn zawng zel a ni. Tunah hian Tuichangral Games buaipuituten Mizoram sawrkar an sawmlut a ni lo, sawrkar hian he Games-a rawn tel ve hi kan rawn dil zawk a ni. Naupang talent nei thate kan rawn zawng a, nakkumah pawh kan la rawn zawng leh ang. He Games-ah hian tawp mai tum lo ula , C. Lalremsanga anga Olympic khel thei nih lo tum ang che u, tiin a chah.
A hawnna inkhawm hi Pu Lalrengpuia Colney, Sr. Vice President, TGSA in a hruai a, Pu B. Lalnunthara, General Secretary, Tuichangral Games & Sports Association chuan report a pe a, TGSA huam chhungah khaw 33 an awma, kuminah hian khaw 17 an inlan ang. Men Football, Women Football, Men Volleyball, Women Volleyball, Men Badminton Single, Men Badminton Double, Women Badminton Single, Women Badminton Double, Men TT Single, Men TT Double, Women TT Single Women TT Double. Under -16 tan bik Boxing, Wrestling, Weighlifting, a vaiin inelna chi 15 ah an nei ang.
Attachment
Written by: K. Saitluanga, MIS, PIO to Chief Minister
