Aizawl, the 15th May, 2024: Inter District Women Football Championship 2023-2024 Serchhip neih chu Final Match-ah Aizawl District chuan Serchhip District hnehin Champion nihna an hauh.
He Championship kharna hun hi Ni 15.5.2024 khan Serchhip Sports Complex-ah hman niin, Pu John Tanpuia, MCS, Secretary, Mizoram State Sports Council chu khuallian a ni.
Khuallian chuan thu sawiin, "Sports hian rilru, taksa leh khawtlang nunah thatna tamtak aneih avangin khawvel pumah ngaih pawimawh a ni a, a bik takin thalaite'n Ruihhlo laka an fihlim theihna atan hmanraw tangkai tak ani thei a ni," a ti. Eizawnna atana hman tum te tan tih tak tak a ngaih thu leh a nawmna lam ringawt ngaihtuah loh a ngai a ni, a ti. Thalai tam zawkin eizawnna atana an hman theihna turin sawrkarin hma a la mek a, kum 2036 Olympics ah Mizo thalai tam thei ang ber an tel theihna turin tun atangin sawrkar in beihpui a thlak tan a, Sport Minister pawhin phai lamah hotu lian te a sawipui tawh a, an ni pawhin lo ngai pawimawhin, thla leh maiah ram pum huap Sport lama mi pawimawh tak tak tenen mizo thalaite engtin nge Olympics-ah an tel theih ang tih ngaihtuahho turin Mizoram Sports Conclave chu Aizawl-ah neih a nih tur thu a sawi.
Pu PC Vanlalhruaia Sr. Vice President Mizoram Football Association pawhin thu sawiin, mipa chauh nilo mizo hmeichhia pawhin india rama football inelna sang women league ah an khel tawh tih a sawi a. Hmeichhia te tan Football-ah eizawnna a awm a, Coaching, referee leh match commissioner-ah te pawh hmeichhia an awm ve tawh thu sawiin, Inter District Women Football Championship-ah district tin atanga team an intir thei chu lawmawm a tih thu a sawi bawk.
Inter District Women Football Championship 2023-2024 Final-ah hian Saitual DFA leh Aizawl DFA te inkhel in Aizawl DFA in 2-0 in hnehna an chang a, C. Zairemmawii leh Lalrinmuani ten goal khat ve ve an khung a ni.
Fair Play Award chu Aizawl DFA-in an dawng a, Best Player-ah Cindy Remruatpuii Colney (Jersey No. 10), Aizawl DFA chu thlan niin, Goal Kua (9) khungtu - Lalrinmuani (Jersey No. 20), Aizawl DFA chu Top Scorer a ni bawk.
Attachment:
