Aizawl, the 8th August 2022:  Vawiin chawhnu khan Jeremy Lalrinnunga, Gold Medalist, Birmingham 2022, Commonwealth Games chuan Mizoram a rawn thleng a. Sports Minister Robert Romawia Royte, President, Mizoram State Sports Council & Mizoram Olympic Association ni bawk te, Pu Zothantluanga, Aizawl West - I bialtu MLA, Sawrkar mi pawimawh te, Sports Discipline hrang hranga infiammite, Sports Association hrang hranga hruaitute leh mipui thahnem takin Lengpui Airport-ah an lo hmuak a. Amah lo hmuaktu zingah hian a nu leh pa leh a unaute pawh an tel a ni. 

Jeremy Lalrinnunga hmuahna inkhawm tawi Lengpui Airport hungchhunga chawlhbukah buatsaih a ni a.He hunah hian inlawmna thusawitu Sports Minister Robert Romawia Royte chuan Mizoram atanga India aiawha infiammi zinga la thleng sang ber Jeremy Lalrinnunga chuan Mizoram a tihmingtha tak zet a. "Zoram mipui ten kan chhuang a, sawrkar ang pawhin kan chhuangin Mizoram Olympic Association hruaitu ka nihna ang pawhin infiammite zawng zawng aiawhin a chungah lawmthu ka sawi a ni",  a ti.

Sports Minister chuan vawiina Jeremy puala programme buatsaih chu Mizoram tihmingthatu hmuahna leh a hlawhtlinna la lawmsak tur aitechhinna a ni a ti a. CWG a India aiawha Bronze Medal la tu Lalremsiami rawn thlen hunah Sawrkarin ropui takin CWG Gold Medalist leh Bronze Medalist te lawmpuina hun a buatsaih dawn a ni a ti.

Jeremy Lalrinnunga chuan hlawhtling turin harsatna tam tak a paltlang a. Retheihna leh harsatna tam takin hlawhtling tura a tumruhna an dang zo lo a, tun dinhmun hi a thleng a ni a ti a. A hlawhtlinna phenah a chhungte thlawpna tha tak a dawnga a, a chhungte pawhin Jeremy tan an theihna sang ber an hlan thin a. Hengah te hian kan infiammite leh kan infiammi nu leh pa leh unauten entawn tur tha tak an nei a ni a ti.

Pu Robert Romawia Royte chuan Sports Policy mumal taka kalpui chhoh mek a nih thu te leh hmalakna pawimawh zualte a sawi a. All India leh International levela tel thei tura inchher nan SAI Centre te a pawimawh tih a sawi a. SAI Centre te hi Central Sawrkar hnuai ni tho mahse Mizoramin kan mamawh belh avangin Mizoram sawrkar chuan siambelh a nih theih nan a nawr mek a ni a ti. Kan hma lawkah North East Olympic neih a ni dawn a. He hunpuiah telh loh Mizo thalaite thiam em em sports discipline te pawh telh a nih theih na tura nasa taka an nawr hnuah telh a ni leh ta a, a phurawm hle a ni a ti.

CWG 2022 Gold Medalist Jeremy Lalrinnunga pawhin ama lo hmuahna pual programme-ah hian thu a sawi a. India ram tana a hlawhtlinna te Mizoram mipuiin an lo lawmpui a, sawrkarin ama lo hmuahna programme a buatsaih chu ropui a tih thu a sawi a. Amah lo tantu leh lo tawngtaisaktute leh Mizoram mipui hnenah lawmthu a sawi a ni.

Jeremy Lalrinnunga hmuahna programme tawi hi Dr Lalrozama, Secretary, SYS chuan a kaihruai a. He hunah hian Sports Association hrang hrangin Jeremy Lalrinnunga hnenah hian lawmpuina pangpar leh thuziak te an hlan a ni. Reception programme neih zawhah hian Jeremy Lalrinnunga chuan Chanchinbumite hmachhawnin zawhna hrang hrang te a chhang chhunzawm a ni.


Attachment








Written by: Malsawmsanga, MIS, Deputy Director