Khawzawl, the 27th September, 2022: Khawzawl District Sports Committee hnuaia post ruak inthlanna hmanga hnawh khah ngai, Sr. Vice Chairman, Vice Chairman leh Asst. Secretary post thlanna chu Pu C.Lalrinzuala, Election Observer, Mizoram State Sports Council uapna hnuaiah vawiin khan tluang takin Khawzawl DC Conference Hall-ah zawhfel a ni.
Vawiin inthlannaah hian Addl. DC Pu Lalvenhima chu Returning Officer a ni a. 2nd IR Battalion Dy. Commandant Pu F. Lalbiakzauva leh Addl. SP Pu Lalringliana Pachuau te chu Polling Officer atana ruat niin, an kaihhruaina hnuaiah inthlanna felfai taka neih a ni. Khawzawl District Sports Committee atana Election Notification hi August ni 24, 2022 khan chhuah niin, nomination-a lut member-te hriattirna chu September ni 12, 2022 khan chhuah a lo ni tawh bawk a. Vote awm zat hi avaiin 25 niin, Sports Associations atanga member 15 leh Ex-Officio atanga member 10 te an ni.
Khawzawl District Sports Committee Sr. Vice Chairman atan Khawzawl District Football Association atanga chhawpchhuah Pu Joseph Vanlalnghaka chu chuhtu awm lovin tlinga puan a ni a. Vice Chairman atan Pu K.C. Ngurbiakzuala, Khawzawl District Wushu Association atanga chhawpchhuah chu thlan niin, Asst. Secretary atan Pu Germana Ralte, Khawzawl District Chess Association atanga chhawpchhuah chu thlan a ni.
Inthlanna zawhfel a nih tak avangin kum 2022-2024 chhunga Khawzawl District Sports Committee hruaitu turte chu a hnuaia tarlan ang hi a ni:
Chairman: Pu C.C. Lalchhuangkima, Deputy Commissioner, Khawzawl District
Senior Vice Chairman: Pu Joseph Vanlalnghaka
Vice Chairman: Pu K.C. Ngurbiakzuala
Secretary: Pu James Lalnithanga, District Sports & Youth Officer (DSYO), Khawzawl District
Assistant Secretary: Pu Germana Ralte
Heng bakah hian Financial Secretary tur chu Council-in a ruat leh dawn a ni.
District Sports Committee hnuaiah hian Mizoram State Sports Council-in Khawzawl District chhunga Sports Association a hriatpui President theuhte, Ex-Officio Members; DUDO, BDO, SO, EE PWD, EE PHED, CMO, DEO, DIPRO leh Council-in a ruatte an tel thei a ni.
Attachment
Written by: Dr. Lallawmkima Thangluah, MIS, DIPRO - CHAMPHAI
