Aizawl, the 27th February, 2024: Ministry of Youth Affairs and Sports, Sports Authority of India (SAI), Association of Indian Universities, Indian Olympic Association leh National Sports Federation-te tangkawp buatsaih Khelo India University Games (KIUG) 2023 Men's football inelna chu vawiin chawhnu dar 4:00 khan Rajiv Gandhi Stadium, Mualpui-ah khar a ni a, chawhnu dar 2:00 a final match hmuhnawm tak Kerela Derby khelhah University of Calicut chuan 2-1 in University of Kerela hnehin an champion a, Punjabi University, Patiala leh Mahatma Gandhi University, Kottayam te chuan pathumna dinhmun an hauh a, goal 6 khungtu Jijo Jaison University of Kerala chu top scorer a ni.
A kharna hun hmanpuitu Sports & Youth Services (SYS) Minister Pu Lalnghinglova Hmar, Chairman, Executive Committee (Mizoram) for Khelo India University Games chuan hlawhtling taka Mizoramin Khelo India University Games 2023 a thleng thei chu lawmawm a tih thu sawiin, a hlawhtlin theih nana theihtawp chhuahtute chhuanawm a tih thu a sawi a. State pawn atanga infiammi lokal leh anmahni rawn tawiawmtute chu Mizorama an cham chhungin hun nuam tak an hman a beisei thu sawiin, thil tha leh mawi an hmuhte chhinchiaha thehdarhtu nih tum tur leh a tha lam zawnga Mizoram hriat reng tum turin a chah a. India ramah football chu infiamna chauh ni lo, eizawn nana hman a nih tawh thu sawiin, University zirlai mi thiam tak takte chu lehkhathiam leh football thiam an nih kawpna chu tangkai taka hman chhuah tum turin a fuih nghal bawk.
Khelo India University Games 2023 mipa football inelna kharna hun hi Pu Lalramsanga Sailo, Secretary, Sports & Youth Services Department chuan kaihruaiin Pu Lalrengpuia, Competition Manager hnen atangin report ngaihthlak a ni a. Pu Lalnunhlua, Director, Sports & Youth Services Department-in lawmthu sawiin hun hman a khar a ni.
Khelo India University Games hi India rama University level inelna sang ber niin, kumin hian North East India-a state 7 te'n an inthlen tawm a, Assam chu main host niin, sports discipline hrang hrang 15 a thleng a. Manipur tiam lovin State dang zawngin sports discipline 1 theuh an thleng thung a ni. Infiamna discipline hrang hrang hmangin intihsiakna neih a ni a, February ni 19 ah tanin February ni 29, 2024 hian a hmawr bawk a ni ang.
Khelo India University Games 2023 mipa football inelna bik atan hian University Team 8 te qualify-in, group hnihah then an ni a, league cum knock out system-a khelh a ni. Khelo India University Games-a telte hi Association of Indian Universities (AIU) intihsiaknaa Football-a ti tha team 8; Punjabi University, Patiala; Guru Nanak Dev University, Amritsar; University of Calicut, Kerala leh University of Calcutta, Mahatma Gandhi University, Kottayam; Adamas University, West Bengal, Shivaji University, Kolhapur leh University of Kerala te an ni.
Khelo India University Games 2023 mipa football inelna bik kaihhnawihah hian infiammi 161, Supporting staff 21, Technical official (AIFF) 23, General official 48, Sports Specific Volunteer 18 te an tel a, a hlawhtlin theih nan MYAS & SAI Official-te bakah Nodal Department SYS kaihhruai Line Department hrang hrang telna Local Organising Committee member-te'n theihtawp an chhuah a ni.
Khelo India University Games 2023 Men's Football-ah hian match 15 khelh niin goal 47 a lut a, match tina goal 3.13 zel lut anga chhut a ni. Goal thuntu mi 24 awmin, clean sheet tum 7 awmin Punjabi University leh University of Calicut ten tum 2 an nei a. Yellow card 37 leh double yellow card tum 1 phawrh a ni.
Khelo India University Games 2023 Men's Football kharna hun hi Pu Lalfamkima, Deputy Speaker, Pu V. Malsawmtluanga, MLA, Vice Chairman, High Powered Committee, Lt. Col. Clement Lalhmingthanga, MLA, Pu Jeje Lalpekhlua, MLA leh Pu Lalramliana Papuia, MLA te'n an telpui bawk.
Attachment
Written by: Dr. Lallawmkima Thangluah, MIS, IPRO
