Aizawl, the 17th February, 2025: Vawiin khan Pu Lalnghinglova Hmar, Sports & Youth Services Minister chuan Larsap Gen (Dr) Vijay Kumar Singh, PVSM, AVSM, YSM (Retd) chu Raj Bhawan-ah hmuin Mizorama sports hmasawnna turte an sawi dun.
Larsap chuan Mizoramin infiamna lama theihna a neih thu leh football avanga a hmelhriat thin thu sawiin, "Football piah lamah hian hmasawn theihna sang tak Mizoram hian a nei," a ti a. Larsap chuan Union Sports Minister a lo biak tawh thute, Mizoramin Vision Olympics 2036 a neih avanga lawmawm a tih thute a sawi bakah, sipai lamah pawh a tul anga thawhpui tur a lo zawn tur thu a sawi bawk.
Sports & Youth Services Minister Pu Lalnghinglova Hmar chuan Mizoramin infiamna lama hma a lakna kawngah State flagship programme 'Bana Kaih' hnuaiah Empowering Mizoram Sports an kalpui tur thute, thingtlang hrut chhuaka sports lama talent zawnchhuah hna kalpui tura ruahmanna an neih dante Larsap hi hrilhin, Mizoram hmathlirte tihpuitlinna kawngah theihtawp chhuahpui turin a sawm a, a tawn hriat pawimawh leh hnathawh tawhnate chu Mizoramin a chhawr tangkai ngei a beisei thu a sawi a. LESDE leh Excise and Narcotics Department enkawltu ni bawk Pu Lalnghinglova Hmar chuan ruihhlo do kawngah sports a tangkai thute leh eizawnna a nih chhoh mek thute Larsap hi a hrilh bawk.
Attachment
Written by: Dr. Lallawmkima Thangluah, MIS, PRO to Governor
