Aizawl the 11th November, 2021 : LPS Fight Night 2 chu November 27, 2021 hian Dawrpui Multipurpose Hall, Aizawlah neih a ni dawn a. Vawiin khan Sports Minister Pu Robert Romawia Royte hovin LPS neitu Pu Lalsawmliana Pachuau bakah main event a inhnek tur NT Lalbiakkima leh mi pawimawh dang ten Sports Minister pisaah media mite an kawm.

Pu Robert Romawia Royte chuan LPS chhungkuate, boxing promoter te, coach te, infiammi te leh Mizoram mipuite zarah Mizoram Boxer ten tun dinhmun an thleng thei leh a tum hnihna atan Mizoram chhung ngeiah professional fight neih a ni leh tur chu lawmawm a ti a. LPS Fight Night 2 a hlawhtlin theihna tura duhsakna hlanin Sawrkarin kan tih ve tur ti turin kan inhawng a, theihtawp chhuah kan inpeih reng a ni, a ti. Khelo India Centre of Excellence a thlan tlemte zingah Mizoram tel vein tunah hian chak taka hmalak mek a ni, Sports Minister chuan a ti a. Boxing, judo leh weightlifting-ah te training leh inenkawlna tha ber ber thalaiten an dawng chho dawn a, football ah Kolasib Saidan chu District Centre of Excellence a thlan niin hockey ah Kawnpui thlan a ni, tih a sawi bawk. Minister chuan IBA Intercontinental Title humhim tura khel tur NT Lalbiakkima leh Mizo boxer inhnek tur zawng zawng te duhsakna a hlan a, he event hlawhtlinna turin mipui a tam thei ang berin live a lo thlir turin a sawm bawk a ni.

International Boxing Association (IBA), USA leh Professional Boxing Commission, India phalna angin LPS Boxing Promotion leh Marine Pro Boxing Promotions bultumin LPS Fight Night 2 hi buatsaih a ni dawn a. IBA Intercontinental Title kawltu NT Lalbiakkima leh Thailand boxer Gerttipong Kumsahwat te inhnek chu main event a ni ang a. Anni bakah hian Vanlalawmpuia, Laldingliana, F.Zoramchhana, C.Lalhruaitluanga, HC Lalramfela leh H.Lalrinhlua te chuan India ram state hrang hrang atanga lo kal professional boxer dangte an hnek dawn a ni.

He event ah hian ring official chu Professional Boxing Commission an ni anga, doctor chu Mizoram chhunga mi hman a ni ang. COVID-19 avangin mipui nawlpui hnenah inhnek enna ticket hralh a ni dawn lo a. Pay Per View chi hnih a pekchhuah a ni thung ang. LPS Vision pawttute hnenah Cable PPV Home unit khat cheng 60 a hralh chhuah tur a ni a. Smartphone app Chhimbal kaltlangin unit khat cheng 100 + tax pein khawvel khawi hmun atang pawhin a en theih dawn a ni.

LPS Vision Fight Night 2 senso zawng zawng hi LPS Vision-in a tum anga. He event atana boxer leh official Mizoram pawn atanga lo kal turte kalna, hawna leh an cham chhunga an senso zawng zawng bakah hlawh thlengin LPS Vision in a tum dawn a. Thailand boxer Kumsahwat leh NT Lalbiakkima te hian US Dollar 1500 ve ve an hlawh dawn a ni.