No.1140/2021-202
Dated 26th June, 2021: Vawiin khan Lunglei HPC Vice Chairman Pu Lawmawma Tochhawng, Lunglei East bialtu MLA ni bawk leh Lunglei South Bialtu MLA & SEDP Bamboo Development Board Vice Chairman Dr K. Pachhunga te chuan Lunglei khawpui an bial chhunga Sports hmasawnna ruhrel siam mekte leh siamthar turte an tlawh a.
Lunglei Zobawka Mizoram State Sports Academy Rs 3430.98 Lakh senga sak mek tlawhin hnathawh hrang hrangte a hmunah an en a. Covid hripui kara dan anga phalna nena hna chak taka a kal mek chu lawmawm an ti a. He Academy ah hian Sikul building te, Mipa Hostel leh Hmeichhe Hostel te, Laboratory building te, Coach leh Zirtirtu Quarters te, Principal Quarters te, IT Rooms te, Music Room te, Conference Hall te, Swimming Pool te, Multipurpose Hall te, Football Astroturf Ground, Volley ball court, Basketball court te dah a ni ang. He Academy ah hian Lehkha zirna leh sports zirna a awm kawp dawn a ni. Pu Lawmawma Tochhawng chuan MNF Sorkar hmasak lai kum 12 liamta a bul lo tan tawh Zobawk a Mizoram State Sports Academy sak chhunzawm thar a ni leh ta chu lawmawm a tih thu sawiin Contractor te pawh hna tha taka thawk turin a fuih a. Lunglei mai nilo Zoram puma infiamna lam zir duh tan a hlu hle dawn a ni a ti.
Tukin vek khan Lunglei Salem Venga Standard Hockey Ground siamna tur hmun pawh an tlawh a, He Hockey Ground hi Zoram chhim lama hockey astroturf ground awmchhun tur ani rih a, Rs 1108. 70 Lakh seng a siam tur a ni. Hockey Ground siamna tur Salem Veng bialtu MLA Dr K. Pachhunga chuan chhimlam district 4 ah standard Hockey Ground pakhatmah a awmloh avangin mamawhna a sang a. Chief Minister Pu Zoramthanga leh Sports Minister Pu Robert Romawia Royte ten Lunglei khawpui duhsaka ka biala standard Hockey Ground an rawn dah avangin Lunglei mipui kan lawm hle a ni a ti.
MLA te hian Lunglei Electric Venga Astroturf Football Ground siamna hmun tur pawh tlawhin Engineer ten survey neiin an teh fel nghal a, he football ground siamnan hian PMJVK scheme atangin Rs 812.98 Lakh sanction niin Rs 365.84 Lakh rawn release nghal a ni.
Lunglei Ramthar Venga Standard Futsal Ground siamna tur pawh an tlawh a. Bialtu MLA Pu Lawmawma Tochhawng chuan Lunglei khawpui manawh leh rualawh em em na standard Futsal Ground, Pavillion leh Gallery te siamna tur sum sanction a ni leh siam nghal mai tura hmalak tan a ni ta chu lawmawm a tih thu a sawi. He futsal project atan hian Central sorkarin Rs 319.78 Lakh a sanctioned a, Rs 143.90 chu Mizoram sorkarah a rawn released tawh a ni. Lunglei East MLA & HPC Vice Chairman ni bawk Pu Lawmawma chuan Sports Minister Pu Robert Romawia Royte hmalaknaa Sorkarin Mizoram Sports Policy 2019 a nei ta hi a ropui a, a zar Zoramin a zo chho mek zel a, ala zo zual zel ang a ti.
MLA te hi Pu C. Lalremsanga Lunglei District Sports & Youth Officer (DSYO) leh Mizoram State Sports Council (MSSC) Engineer ten an tawiawm a ni.
Attachment
