Lunglei, 2025 Ramtuk thla ni 25: India sawrkar Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kal tlanga cheng nuai 290.97 senga Lunglei Ramthar Venga Futsal Ground sak thar chu vawiin khan Lunglei South bialtu MLA Pu Lalramliana Papuia'n a hawng.
Lunglei South bialtu MLA Pu Lalramliana Papuia chuan Lunglei Ramthar Vengah Mizorama international standard futsal ground hmasa ber hman theiha hawn a ni ta chu lawmawm a tih thu sawiin, a bul lo ṭantu leh hma latu sawrkar hmasa leh hruaitu hmasate chungah lawm thu a sawi a. A chhawrtu tur chu Ramthar Veng mai bakah Lunglei mipuite leh ṭhalaite an ni tiin, sawrkarin mipuite tana hmasawnna hna a thawhah mipuite'n lawm thu an sawina leh sawrkar an rulh let theihna ṭha ber chu sawrkar ruahman anga ṭangkai taka hman a ni, a ti a. Futsal ground changtlung tak hawn thar tak chuan ram leh hnam tihmingṭhatu, mi hlawhtling rah chhuah duhawm tak tak a neih a beisei thu a sawi.
Pu Lalramliana Papuia chuan sawrkarin Mizoram Bana Kaih Scheme hnuaiah infiamna tihhmasawnna tur, "Empowering Mizoram Sports" a kalpui mek thu sawiin, "Vision 2036" tia kum 2036 Olympics-ah Mizo ṭhalai tam zawk an inlan theih nana hmathlir neia hma a lak chhoh mekah Ramthar Veng leh Lunglei infiam mi ṭha tak tak an chhuah chhoh a beisei thu a sawi a. Ramthar Veng khawtlang hruaitu (local council) atana thlan tharte lawmpuina leh duhsakna hlanin, khawtlang tan ṭhahnem ngai taka hma la zel turin a chah a. Khawtlang ro tling hma lakna a awm theih nan khawtlang hruaitute leh mipuite kovah mawhphurhna lian tak a awm tih sawiin, hmasawnna hna thawh lo enpui a, lo vilpui tur te, siam ṭhat ngai laite a siam ṭhat theih laiin a thlenna hmun dik takah thlen ṭhin tur te'n a chah a ni.
He hun hi Lunglei District Sports & Youth Officer Pu K. Lalthlengliana'n a kaihruai a. Pro Pastor David C. Lalnunkima (BCM) chuan hunserh hmangin, MSSC-a Assistant Engineer Pu James Lalramnghaka'n Futsal Ground thar hawn tak chungchang technical report a pe a. Ramthar Veng LC Chairman Pu F. Lalzawmliana'n lawm thu sawiin hun a khar a ni.
Vawiina Futsal Ground thar hawnnaah hian Lunglei Municipal Council (LMC)-a Ward No. IV Councillor Pu R. Lalramzauva te, Bialtu MLA hlui Pu Lawmawma Tochhawng te, sawrkar official-te, Lunglei District Sports Committee (LDSC) hruaitute, political party hruaitute, hna thawktu M/s Creative Minds lam leh Ramthar Veng khawtlang hruaitu leh khawtlang mipuite an tel a ni.
Lunglei Ramthar Venga Futsal Ground siamna tur atan hian India sawrkar Ministry of Minority Affairs hnuaia PMJVK Scheme 2020-2021 kal tlangin cheng nuai 319.78 dawn a ni a. Central share hi 90% (cheng nuai 287.80) niin, state share hi 10% (cheng nuai 31.98) a ni a. Hna thawk tur hian tender chhuah a nih hnuah M/s Creative Minds, Chanmari West, Aizawl chu thlan niin, work order amount hi cheng nuai 290.97 a ni a. Hna hi July ni 18, 2022 khan ṭan niin, October ni 7, 2024 khan zawh fel a ni.
Futsal Ground hi semi-indoor niin, RCC structure leh steel structure hmanga sak a ni a. Eng hun pawha hman theih turin a chung neia siam niin, a chung atan hian DYNA roof hman a nih bakah, a bang chung lam pawh DYNA roof hmanga pin kual vek a ni a, a hnuai lam hi Poly Coated Steel Net hmanga hung kual vek a ni bawk a. Zanah pawh khelh theih turin stadium light eng ṭha tak dah tel nghal a ni bawk.
Inkhelhna tur chin (playing area) chhuat (flooring) hi RCC-a siam niin, plaster hnuah self leveling compound hmanga level lak leh vek a ni a. Hemi chungah hian Vinyl Sports Flooring phah niin, flooring zau zawng hi a dung metre 45 leh a vang metre 25.50 a ni a. Playing area line marking hi metre 40 leh metre 20 biala zau niin, hei hi futsal khelhna tura World Futsal Association-in a pawm ang a ni a. He hmunah hian khawvel pum huap inelna (international futsal competition) pawh a khelh theih dawn a ni.
Futsal Ground-ah hian RCC Gallery a dung metre 23 leh a vang metre 4-a zau sak tel niin, gallery-ah hian mi 100 vel leng thei tura ngaih a ni a. Inkhel turte thawmhnaw inthlakna (player changing room) metre 11.60 leh metre 4 biala zau ruahman ni bawkin, team pahnih awm theihna turin hmun hniha ṭhen a ni a, inthiarna (toilet) dah tel ve ve a ni bawk.
Lunglei Ramthar Venga Futsal Ground thar hawn tak hi MSSC hnuaia kalphung pangngai angin Lunglei District Sports Committee (LDSC) enkawlna leh ruahmanna hnuaiah a enkawl tur local management committee (LMC) dinte'n an enkawl zui tura ruahman a ni.
Attadhment
Written by: C. Lalhruaitluanga, MIS, Deputy Director
