2024 Khuangchawi thla ni 7: Vawiin khan Lunglei District Sports Committee (LDSC) chu an Chairman, District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm.
Chairman Pu R. Lalṭhazuala chuan member-te lawmna thu sawiin, Lunglei District-in infiamnaa hma a sawn zel theih nan ngun taka ngaihtuahna seng turin a sawm a. LDSC Secretary, District Sports & Youth Officer Pu K. Lalthlengliana'n report pein, thu ngaihtuah tur a sawi zau va. LDSC hun thar atana hruaitu thlan chungchang te, infiamna peng hrang hrang tihhmasawnna tura pawl hrang hranga sum pek chungchang leh ṭul pawimawh dangte sawi ho zui a ni.
Mizoram State Sports Council (MSSC) aṭanga LDSC-in lehkha a hmuh angin, LDSC term kal lai mek chu ni 12.09.2024 khan a tawp tak avangin term thar atan inthlan buatsaih a ṭul a. Hruaitu term hi kum hnih niin, LDSC-ah hian MSSC hnuaia inziak lut sports association hrang hrang president ṭheuhte member an nih bakah, sawrkar department hrang hrang ai awhte chu ex-officio member an ni a. District Bawrhsap chu chairman niin, DSYO chu secretary a ni a; financial secretary chu MSSC-in DSC rawtna aṭanga a ruat chawp tur niin, a bak nihna chanvo dang pathum - senior vice chairman, vice chairman leh assistant secretary te chu sports association president-te aṭangin DSC-in a thlan tur a ni.
He ṭhut khawmah hian District chhunga sports association hrang hrangte'n inelna an huaihawtna leh District ai awha an feh chhuahnaa an sensote phuhrukna tura sum an dilna te thlir ho a ni a. December ni 17 - 20, 2024 chhunga Pathian thu hmanga ṭhalaite kut, "Youth Festival" buatsaih nana C. Ṭhuamluaia Mual hman dilna te ngaihtuah ho a ni bawk.
Attachment
Written by: C. Lalhruaitluanga, MIS, DIPRO - LUNGLEI
