2024 Khuangchawi thla ni 23: Vawiin khan Lunglei District Sports Committee (LDSC) chu an Chairman, District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a. Hun bi (term) thar atana hruaitu tur an thlang nghal.

Chairman Pu R. Lalṭhazuala chuan Lunglei District chhunga infiamnain hma a sawn theih nana LDSC hruaitu ni mekte leh member-te inpekna leh thawh honaah lawm thu sawiin, hun bi thara hruaitu ni turte leh member-te chu ṭhahnem ngai taka Lunglei District tana thawk chhunzawm zel tura chahin duhsakna a hlan a. LDSC Secretary, District Sports & Youth Officer Pu K. Lalthlengliana'n July 2022 leh October 2024 inkar chhunga LDSC chet velna tar langin, Financial Secretary Pu K. Lawmchhunga hnen aṭangin sum dinhmun ngaihthlak a ni bawk.

Hemi hnu hian LDSC hun bi thar (2024-2026) atana hruaitu tur, nihna chanvo (office bearer post) pathum - Senior Vice Chairman, Vice Chairman leh Assistant Secretary chelh tur thlanna buatsaih zui a ni a. Returning Officer, Lunglei District Local Administration Officer Pu Beitlotha Nohro leh Polling Officer pahnih - Additional Superintendent of Police Pu K. Beihmotaosa leh District Officer (Land Resources, Soil & Water Conservation) Pu F. Lalramnghinglova te'n inthlan hi buaipuiin, Mizoram State Sports Council (MSSC) aṭanga observer, Pu R. Lalrinmawia, Senior Sports Promotion Officer chuan a vil bawk a. He'ng a hnuaia mite hi kum 2024 - 2026 chhunga Lunglei District Sports Committee hruaitu thar atana thlan tlin an ni:

1) Senior Vice Chairman - Pu PC Lalramnghaka

2) Vice Chairman - Pu P. Lalchamliana

3) Assistant Secretary - Pu Daniel Lalramhluna

District sports committee hi Mizoram State Sports Council (MSSC) hnuaiah din niin, Chairman-ah District Bawrhsap leh Secretary-ah District Sports & Youth Officer te chu ruat sa an ni a. District chhunga MSSC hnuaia inziak lut (recognised) sports association hrang hrang President ṭheuhte member an nih bakah, sawrkar department hrang hrang pariat ai awhte chu ex-officio member an ni bawk a. Tun dinhmunah Lunglei District Sports Committee hnuaiah hian MSSC recognised sports association 29 an awm mek a ni.



Attachment



Written by: C. Lalhruaitluanga, MIS, DIPRO - LUNGLEI