Lunglei, 2025 Sahmulphah thla ni 15: Vawiin khan Mizoram sawrkara Sports & Youth Services (SYS) Minister Pu Lalnghinglova Hmar kaihhruaina hnuaiah SYS Department leh Lunglei District Basketball Association (LDBBA) hruaitute chuan Lunglei Circuit House-ah Sazaikawn Multipurpose Hall enkawl chungchanga inremna (Memorandum of Agreement) an ziak fel.
Sports Minister hi Lunglei West bialtu MLA Pu T. Lalhlimpuia bakah, Sports & Youth Services Department hotute'n an ṭawiawm a. Inremnaah hian SYS Department ai awhin Director Pu H. Lalhmingthanga'n hming ziakin, LDBBA ai awhin President Pu Moses Lalrinchhana Chinzah chuan hming a ziak thung a. Hriatpuituah SYS Department Joint Director leh Lunglei DYSO te, LDBBA General Secretary leh Joint Secretary te'n hming an ziak bawk.
Sports Minister Pu Lalnghinglova Hmar chuan Sazaikawn Multipurpose Indoor Stadium chu kum 2018-a hawn tawh ni mah se, hawn hnuah luah loh leh enkawl zui lohva a awm reng avangin a ramin, a tlabal nasa hle tih sawiin, nikum July ni 2 khan bialtu MLA Pu T. Lalhlimpuia leh LDBBA hruaitute nen a hmuna an tlawh thu leh hman ṭangkai dan dapa sawi ho a nih hnuah basketball hmunhma atan cheibawl ni se, tih a nih thu a sawi a. Sawrkarin hmunhma leh hmanraw ṭha min pekte hlut thiam leh hman ṭangkai a ngaih thu sawiin, sawrkarin sum tam tak senga hmunhma leh hmanrua a dinte ṭangkai taka hman leh enkawl chu khua leh tuite mawhphurhna a ni, a ti a. Sazaikawn Multipurpose Hall chu sum awm thei ang ang bel a nih hnuah basketball khelh theiha chhuah a ni ta chu lawmawm a tih thu sawiin, LDBBA te chu duat tak leh ṭha taka enkawl thei tur nia ngaiin, a neitu nihna pe lovin, a enkawltu nihna an kutah hlan a ni tih a sawi a. Ṭha tak leh duat taka enkawl a, ṭhalaite leh infiamnain hma a sawn theih nan ṭangkai taka hmang turin a chah.
Lunglei West bialtu MLA Pu T. Lalhlimpuia chuan basketball hmasawnna tura bialtu MLA leh LDBBA te'n an ngenna Sports Minister-in a tihlawhtling chu an lawm thu sawiin, tun sawrkarin thil chhia leh hluihlawn tawh a tihnun leh a tihṭhat eng emaw zat zingah Sazaikawn Multipurpose Hall a tel chu lawmawm a tih thu a sawi a. Lungleiah siam ṭhat leh tihnun tur, ṭan lak ngaihna a la tam tih sawiin, pawl hrang hrang leh mimalte'n sawrkar thawhpui a, ram hmasawnna atan ngaihtuahna seng turin a chah a. Sawrkar ṭanpui tlaka mahni pawh inngaihtuah thiam a ṭul thu a sawi bawk.
SYS Joint Director Pu C. Lalremsanga chuan Sazaikawn Multipurpose Hall chei ṭhat a nih dan leh basketball khelh theihna tura hma lak a nih dan report a pe a. LDBBA President Pu Moses Lalrinchhana Chinzah pawhin tournament khelhna leh player chherna tur hmunhma an mamawhna hriaa Sports Minister, bialtu MLA leh department te'n hma an lakpuinaah lawm thu sawiin, Sazaikawn Multipurpose Hall chu theih tawp chhuahin, a ṭha thei ang bera enkawl an tum thu a sawi.
Sazaikawn Multipurpose Indoor Stadium hi Ministry of Youth Affairs & Sports hnuaia Urban Sports Infrastructure Scheme sum cheng vaibelchhe 6 senga sak niin, a sak hna hi Lushai Engineers te'n an thawk a. A zau zawng hi square metre 2,484.86 niin, February ni 9, 2018 khan hawn a ni.
He Indoor Stadium hi hman ṭangkai zui lohva hun eng emaw chen a awm hnuah, nikum July ni 2 khan Sports Minister hovin bialtu MLA Pu T. Lalhlimpuia leh LDBBA hruaitute'n a hmunah tlawhin, basketball hmunhma atana hman ṭangkai theih dan tur an en ho va. Basketball khelh theihna tur hian SYS Department Grant-in-Aid aṭangin cheng nuai 25 senga chei ṭhat a ni.
SYS Department leh LDBBA inremna ang chuan, Multipurpose Hall, Sazaikawn, Lunglei hi a neitu nihna chu Mizoram Sawrkar Sports & Youth Services Department kutah awmin, a enkawltu (guardian) chu Lunglei District Basketball Association (LDBBA) a ni dawn a. Multipurpose Hall aṭanga pawisa lak luh chu SYS Department-ah 30%, Hall enkawl nan Management Committee-ah 50% leh LDBBA sumah 20% a lut ang. He inremna hian agreement ziah ni, November ni 15, 2025 aṭanga kum 3 (thum) chhung a huam ang a; a ṭul anga en nawn theih a ni ang.
Attachment
Written by: C. Lalhruaitluanga, MIS, Dy Director - Lunglei
