Mumbai, the 17^th of September, 2025: Nimin chawhnu khan Pu Lalnghinglova Hmar, Minister of State, Labour, Employment, Skill Development & Entrepreneurship (LESDE)leh Pu Akash Fundkar, Labour Minister, Maharashtra te chu Mumbai-a Maharashtra Labour Minister office-ah an inkawm.

Mizoram Labour Minister Pu Lalnghinglova Hmar chuan Maharashtra chu state lian leh hausa, Labour chungchangah pawh kalphung ngelnghet leh felfai nei a ni a, Mizoram tan zir tur engemawzat a awm tih a sawi a. State pahnihin ‘labour’ an kalpuinaa an tihdan tha lai (best practice) ve ve te inzirtawn a duh thu Maharashtra Minister hnenah hian a thlen a, thawhho dan tur an sawi dun.

Maharashtra Labour Minister chuan Mizoram Minister chu tha taka lo dawngsawngin an state-a labour chungchang ṭha taka an kalpui dante zir chiang turin Mizoram sawrkar official-te a sawm a, theihtawp chhuahpui a tum. Minister pahnihte hian Labour kaihhnawih bakah CSR fund lam hmalak dante pawh an sawi dun a; Mumbai sumdawnna khawvela Mizoram tana ṭangkai turte inhmelhriattir leh kawng kawhhmuh kawngah Pu Akash Fundkar chuan hma a lak tur thu a sawi.

Sports Minister ni bawk Pu Lalnghinglova Hmar hian vawiinah vek khan Pu Siddharth Sharma, CEO, Tata Trusts chu Mumbai-a Tata Trusts office-ah a kawm a, Aizawl-a Badminton High Performance Centre sak chungchanga thawhho dan tur an sawi dun.

High Performance Centre-ah hian court 10 awm tura ruahman a ni a, a senso tur zat leh a sum hmuhna turte an sawi dun a; Tata Trusts lam hian Mizorama badminton hmunpui sakna tur a puitlin theihna turin theihtawpa puih an tum a, a kalpui zel dan sawiho leh tura tih a ni.

Minister hi Pu Henry C. Lalrawnkima, Secretary, Mizoram State Sports Council leh Pu H. Lalramenga, PS te’n an tawiawm a ni.

Attachment