Aizawl, the 29^th of August, 2024: Vawiin chawhma khan Pu Lalnghinglova Hmar, Minister of State, Sports & Youth Services leh LESDE Department chuan Dr. VK Paul, Hon’ble Member, NITI Aayog chu New Delhi-a NITI Aayog Headquarters-ah a kawm a, Mizoram thalaite ta’n Mizorama Skill Training Centre din chungchang leh Olympic 2036 a Mizo infiammi tam thei ang ber an tel theih nana hmalakho dan tur an sawidun.

Sports & Youth Services Minister Pu Lalnghinglova Hmar chuan Olympic 2036 ah Mizoram atanga infiammi tam thei ang ber tel se an duh thu leh chumi atan kumin June 13-14 ah Mizoram Sports Conclave buatsaih a nih tawh thute sawiin, Mizoram chuan National Games 2032 thlen ngei a duh tih a tarlang a, Mizoram Sports Conclave report a pe nghal bawk. Sports chu intihhlimna mai ni lo, taksa leh rilru hriselna atana pawimawh tak leh khawvel hmuha India pholang theitu a nih thu a sawi a ni.

LESDE Minister ni bawk Pu Lalnghinglova Hmar chuan Mizorama Skill Training Centre lian a awm loh avangin Mizo thalaite’n harsatna an tawh thin thu pawh thlenin, Central Sawrkar hnuaia Skill Development project-ah Mizoram nena inmil leh Mizo thalaite thiam zawng job role siam a pawimawh thu a sawi a. Mizoram thalaite’n kut themthiam kawngah theihna sang tak an nei a, an theihnate phochhuak a, eizawnna’n an hman theih nan NITI Aayog nen thawhdun a duh thu a sawi a ni.

NITI Aayog member Dr. VK Paul chuan Minister thu thlente chu mimal tak pawha a ngaihpawimawh hlawm thu a sawi a. Ziaka rawtna (proposal) chiang zawk nen, State Sawrkar leh NITI Aayog te’n presentation siama September thla chawhma lamah meeting neih leh nise tiin an rel a ni. Minister-in a sawm angin, October thla chhung ngeia Mizorama lo zin a tum thu Dr. VK Paul chuan a sawi bawk.

Minister chuan NITI Aayog-a Adviser for Northeast Pu Yugal Joshi pawh a kawm nghal a. Olympic 2036 inbuatsaihna pakhatah, Public-Private Partnership (PPP) mode-in sports discipline hrang hrangah coaching kalpui tum a nih thu leh, Mizorama khua zawng zawng telh tum a nih thu a sawi a. NITI Aayog Adviser chuan project tha leh hmathlir thui tak a nih thu sawiin, a hlawhtlin theih nan a lo bawhzui tur thu a sawi a ni.

Sports & Youth Services Minister Pu Lalnghinglova Hmar hi Pu John Tanpuia, Jt. Secretary, Sports & Youth Services Department leh Pu Henry C. Lalrawnkima, Secretary, Mizoram State Sports Council te'n an tawiawm a ni.

Attachment