Aizawl, the 29^th of August, 2024: Vawiin chawhnu khan Pu Lalnghinglova Hmar, Minister of State, Sports & Youth Services leh LESDE Department chuan Pu Kiren Rijiju, Hon’ble Minister, Ministry of Minority Affairs chu New Delhi-ah a hmu a, Ministry hnuaia project awm thei hrang hrangah sports leh skill development hmasawnna tur project telh ve chungchang an sawidun.

India ramin Olympic 2036 thlen a tum a, he Olympic Games-ah hian Mizoram atangin infiammi tam thei ang ber tel an duh thu leh, chumi atan June 13-14 ah Mizoram Sports Conclave buatsaih a nih tawh thu te Sports Minister Pu Lalnghinglova Hmar chuan a sawi a. Mizoram chuan National Games 2032 thlen ngei a duh thu sawiin, Minority Affairs Ministry hnuaia project hrang hrangah sports hmasawnna ruhrel telh ve ngei a pawimawh thu a thlen a ni.

LESDE Minister ni bawk Pu Lalnghinglova Hmar chuan Mizo thalaite’n kut themthiam kawngah theihna sang tak an nei tih sawiin, an theihna hlawhtlinpui turin Mizoramah Skill Training Centre lian tham din pawimawh a tih thu a thlen bawk a ni.

Pu Kiren Rijiju chuan Ministry of Minority Affairs hnuaia project-ah Mizorama sports leh skills hmasawnna tur tel thei se a duh thu sawiin, hemi chungchangah Mizoram Chief Minister Pu Lalduhoma nen pawh an inkawm tawh thu Sports Minister chu a lo hrilh a ni.

Pu Lalnghinglova Hmar hi Mizoram atangin Pu John Tanpuia, Jt. Secretary, Sports & Youth Services Department leh Pu Henry C. Lalrawnkima, Secretary, Mizoram State Sports Council te’n an tawiawm a ni.

Attachment