Aizawl 20th January 2023: Nimin tlai khan Minister Pu Robert Romawia Royte enkawl Department pathum - ICT, S&YS leh Tourism Department ten kum 2019 atanga kum 2022 inkara an hnathawh leh hmachhawp thlirletna hun Tourism Lodge, Chaltlang-ah an nei.
Minister Pu Robert Romawia Royte chuan thu sawiin hlawhtlinna hi mi pakhat avangin a thleng ngawt thei lo a, thawhhona leh inpekna avanga thleng a ni a ti a. Department pathum ICT, S&YS leh Tourism Department te hlawhtlin zarzo tu a nihna angin lawmthu a sawi a. Kum li chhunga ramin a hriat reng tur thil thar leh hmachawp hrang hrangte thlirletna leh sawihona hun chu hlu a tih thu sawiin Mizoram mipuiten kum thar ah fitness ngai pawimawhin, thalai te chauh ni lo naupang atanga upa te thlenga ngai pawimawh lehzual tura a duh thu a sawi a. Sawrkar hnathawk ten Conduct Rules ngai pawimawha social media hmandan thiam turin a ngen bawk a ni.
S&YS Department leh Mizoram State Sports Council in Sports leh thalaite hmasawnna leh hlawnna tlangpui ngaihthlak a ni a. Mizoramin Sports Policy, 2019 chu ni 15 November, 2019 khan a pawm a, Sports Policy hian Vision mumal tak neiin, Mizo thalaite zinga infiamna lama mibik ten infiamna khawvel a inelna sang berah te tel pha a, hlawhtlinna an neih theihna atan te, infiamna lama eizawnna tha an hmuh theihna tan te, infiamna ruhrel tha an neih theihna atan te leh Mizo mipuite 'hnam hrisel' kan nih theihna atana duan a ni. Infiamna lama mi hlawhtling ten sawrkar hna chi hrang hrang a hamthatna an hmuh theihna atan Mizoram sawrkar hnuaia Group B, Group C, Group D post direct a lak turah 5% a hauhsak an ni a, heng bakah sawrkar hnathawk mek te tan pawh promotion an hmuh theihna tur ruahmanna siam tel a ni bawk a ni. Sports chu Industry dinhmunah a hlangkai a, Mizoram chu India ram chhunga State zawng zawng zinga infiamna industry dinhmun pe hmasa bertu a ni tih ngaihthlak a ni. Sports Promotion leh Youth Development chak zawka a kal theihna turin Sports and Youth Services hna chanpual siam tha in Allocation of Business Rules, 2019 a chhuah thar a, hei hian Sports hmasawnna tur kawng nasa takin a hawng zau a ni tih a hmasa ber atan Adoption of Mizoram Sports Policy 2019 kan nei a, infiammi te hamthatna leh Sports facility tha leh Sports leh industry kalkawp dan tur te, Sports Tourism leh hmanrua mumal zawka kalpui leh a dangte a awm a ni. Heng bakah hmalakna hrang hrang leh Department in hna a hmachhawpte ngaihthlak leh sawiho a ni.
Tourism Department chuan khualzinte tana tangkai em em home-stay 77 a enkawl mek a, Tourist Lodge 69 a awm a, chung zingah chuan 27 chu outsource a ni a. Kum 2019-2020 inkarah State GDP 3.81% contribute in, kum 2020-2021 khan State GDP ah 3.41% a chhunglut a ni. Department chuan Adventure leh Eco-Adventure Tourism, Wildlife and Eco-tourism, Sports Tourism leh adangte a hmasawnna ramin a neih nan hma a la mek a. Mizoram Tourism tag line atan 'Mystical Mizoram' chu thlan a nih thu ngaihthlak a ni a, kum 2019-2020 inkarah khualzin mi nuai 1.61 vel an lo kal a ni. Tun hnaiah Mizoram sawrkar chuan Mizoram Responsible Tourism Policy 2020 chu a taka hmangin a tihhlawhtlin nan Sustainable Tourism na takin a kalpui thu ngaihthlak a ni a. International Tourism Mart, 2022 chu chhimtu mipui ten an hlut thu leh tlawhtu bakah stall hrang hrang hawngtu ten hlawkna an tel thu ngaihthlak a ni bawk a ni.
ICT Department hmalakna zingah optical fiber network chu thingtlang khaw hrang hrangah thlun a nih thu ngaihthlak a ni a, Mizoram ah 5G a lo luh theih nan hmalak mek a nih thu ngaihthlak a ni. ICT enkawl State Data Centre pawh tihphuisui zel a ni bawk a ni. Heng bakah hian thil dang hmalakna leh hmachhawpte ngaihthlak leh sawiho a ni bawk.
Attachment
Written by: Dr. Saithantluangi Zote, MIS, IPRO
