Mizoram State Sports Council, Government of Mizoram, India

Aizawl, 05.10.2023: Minister Pu Robert Romawia Royte chuan vawiin tlai khan Aijal Club ah a Department chan zinga Pathum – Sports & Youth Services Department, Tourism Department leh Information & Communication Technology Department hnuaiah project hrang hrang zawh tawh hawnna leh thawh tur sum sanction tawhte lungphum phumna hun chu khuallian niin a hmanpui. He hunah hian Pu TC Pachhunga, Ex-MLA & Vice Chairman, Sports, Youth Affairs, Tourism & ICT Board Office Board chu khualzahawm a ni.

Minister chuan thu sawiin, vawiin programme hmannaah Department pathum te ‘achievement’ pawimawh tak leh Mizoram tan pawh hun chhinchhiahtlak tak a nih thu a sawi a. Kum nga tling dawn department pathum a thawktu officer leh staff te nen thawhhona tha tak neiin, hma an lo lak tawhnaah lawmthu a sawi a. Vawiin an hun hmana project tarchhuah ho, a vai belhkhawm chuan cheng nuai sing khat chuang lai mai sawrkar laipui atanga sum haichhuaka thawh zawh leh thawh tur awmte chu department thawktute nena an thawhhona leh an thahnemngaihna zar a nih thu a sawi a. Mizoram mipui tam tak tana tangkaina thlen tur a nih ngei a rin thu a sawi. Minister Pu Robert Romawia Royte chuan hmasawnna hnathawhte hlawhtlinna chhan pakhat chu a tir atanga langtlang taka kalpui a nih thu sawiin, sawrkar inrelbawlna tha nei tura langtlang taka thil kalpui a tul angin project hrang hrang te pawh mipuiin an hriat tura a tir atanga pholan chu thil tangkai tak nia a hriat thu a sawi bawk.

Khualzahawm Pu TC. Pachhunga chuan vawiin ang hun hman a ni thei chu ropui tiin, department pathumte tan chauh ni lo Mizoram tan pawh thil lawmawm tak a nih thu a sawi a. An department budget aia tam fe sawrkar laipui atanga sum haichhuaka hmasawnna ruhrel pawimawh tak tak state tana an thawk chu fakawm tiin, Minister leh officer leh thawktu dang zawng zawngte chungah lawmthu a sawi a ni.

Vawiin programme hi SYS Secretary Dr. Lalrozama chuan kaihruaiin, Mizoram State Sports Council Secretary Pu John Tanpuia, Tourism Department Jt. Secretary Pu V. Lalengmawia leh ICT Chief Informatics Officer Dr. Lalthlamuana te hnen atangin an department chanpual thueh technical report ngaihthlak a ni a. ICT Secretary Pu Lalramsanga Sailo chuan lawmthu sawiin hun a khar.

A) Sports & Youth Services Department- Vawiina Minister in a hawn takte chu hengte hi a ni:

i) Synthetic Turf Hockey Ground at MSSC Sports Complex, Muallungthu – Rs. 5.50 cr (Khelo India)

ii) Multipurpose Indoor Hall, Sihohir – Rs.12.77 Cr (NEC)

iii) MSSC Sports Hostel, Mualpui – Rs. 8.00 cr (NEDP)

iv) Community Service Centre at Bungtlang South, Bunghmun, Chawngte, Rangte, Zawlnuam – Rs. 7.00 Cr (PMJVK)

v) Volleyball Court with Viewing Gallery at Tuidam, Kanhmun, Thinfhlun, Darlak, Zamuang, Kawrthah North, Sihtlangpui – Rs. 2.20 Cr (PMJVK)

Khelo India Scheme kaltlanga sum hmuh hmangin Khelo India Centre of Excellence 10 Mizoram hmun hrang hranga dinna tur lungphum a phum :

Football:

i) Lena Stadium, Lunglei

ii) Khawzawl Mualvawn Field

iii) Hnahthial Playground

iv) Mamit Football Ground

v) Keifang Centenary Sports Complex

Boxing:

vi) SYS Multipurpose Hall, Lawngtlai

vii) GHSS Boxing Training Institute, Siaha

viii) Serchhip District Boxing Hall

Wrestling

ix) Saidan Hall, Kolasib

Judo

x) Vanlallawma Indoor Stadium, Champhai

Heng bakah hian Minister hian Thuamluaia Mual leh Champhai Chhangphut Field tan flood lighting system siam a nih tur thu a sawi bawk.

B) Tourism Department:

1) Development of Kalvari Tlang at Khawruhlian, Darlawn Block, Aizawl District - Rs. 273.01 lakhs

2) Development of Prayer Mountain at Zuangtui, Hangi Lunglen Tlang, Aizawl - Rs. 491.27 lakhs

3) Development of Pilgrimage and Heritage Tourism Facilitation and Congregation Centre - Rs. 3149.23

Heng project pathum atan hian sawrkar laipuia Ministry of Tourism hnuaia PRASAD (Pilgrimage Rejuvenation And Spiritual Augmentation Drive) atangin sum hmuh a ni.

C) Information & Communication Technology Department:

1) Establishment of IT Skill Development & Training Center in MCA of Mizoram - Rs. 693 lakhs (centre pakhat Rs.99 lakhs zel)

2) Mizo Fibre Grid Network (MFGN) - Rs. 5000 lakhs

3) Construction of Village Knowledge Centre in Mizoram - Rs. 450 lakhs

4) Mizoram ex-services Portal and Upgradation of Mizoram SDC & Cloud Enablement - Rs. 2250 lakhs

Attachment