Dated Aizawl, the 1st September 2026: Zanin khan Vanapa Hall-ah Mizoram Arm Wrestling Association (MAWA) te buatsaih, Mizoram Arm Wrestling Super Match, 'Battle of the Hills' chu Sports Minister Pu Lalnghinglova Hmar chuan a hmanpui.
Sports Minister chuan thu sawiin arm wrestling chu Mizote phurpui chi tak game a ni a; sawrkar pawhin a phurpui a, Mizoram Sports Incentive Cash Award dawng thei zingah telh a ni tawh thu a sawi. Arm wrestling chu kum 2032 Paralympic Games-ah leh kum 2027 National Games-ah telh tuma hma lak mek a nih thu a sawi a, Mizo arm wrestler te leh he sport ngainatute chu duhsakna a hlan a ni.
'Battle of the Hills'-ah hian 65kgs, 75kgs, 85kgs leh 85+ kgs-ah te inelna neih a ni a, Maharashtra atangin Dara Singh leh Kyle Cummings te bakah Asian Arm Wrestling International Cup 2024-a Gold Medal la Denic Lalruattluanga te pawh an inlan a ni.
He arm wrestling match hi kumin October leh November thla a World Arm Wrestling Championship 2026, Delhi a neih tura India ram aiawh tur Mizo arm wrestler 16 te puala buatsaih a ni a. Championship a tel tur hian sum sen a ngaih nual avangin he event-a sum hmuh zawng zawng hi Mizo arm wrestler, he World Championship a tel turte puala dah a ni ang.
Attachment
Written by: Ruth Vanlalmuani, MIS, IPRO
