Aizawl, the 6th September 2022: A hnuaia tarlan ang hian Sports & Youth Services Department chuan “The Mizoram Incentive Cash Award Scheme, 2022” chungchang a puangzar.

Mizo Thalai Infiam mite’n sawrkar atanga hamthatna (Sum faia lawman) an dawn theihna turin, The Mizoram Sports incentive Cash Award Rules, 2001 leh hemi ennawna (Amendment) kum 2008-ah te Mizoram Sawrkar chuan a siam a. He scheme hnuaiah hian Mizo infiammi tam takin hlawkna/hamthatna an lo tel tawh a ni.

Incentive Cash award hi infiam mi 2005 hnenah pek chhuah tawh niin, sum pek chhuah tawh zawng zawng hi Rs 1,36,77,600/- a ni. Incentive award rules hman lai hi kum 10 chuang hman tawh niin, event belh ngai leh sum pek tur zat bithliah te pawh a hniam deuh tawh nia a lan avangin, dan thar, “The Mizoram Incentive Cash Award Scheme, 2022” (link:dipr.mizoram.gov.in/post/mizoram-incentive-cash-award-scheme-2022) chu August ni 30, 2022-a Council of Ministers thukhawm chuan a pawm ta ni.

He Scheme tharah hian National Level leh International Level-a medal late tana sum hmuh tur zat tur chu tihsan niin, International events-ah phei chuan ‘Participation prize’ belh a ni. India ram state dangte leh kan thenawm NE States tihdan te nena uluk taka khaikhin hnuah rate thar hi siam a ni. Mizoram chhung bik infiamna kutpui, District hrang hrangte inelna atan Mizoram sawrkarin a ruahman, “The Mizoram State Games” pawh he dan hnuaia lawmman dawn theihna event atana belh thar a ni.

The Mizoram Incentive Cash Award Scheme, 2022 hi khawvel huap intihsiakna leh India ram chhung intihsiakna hrang hranga Mizo thalai hlawhtlinna chang, Ram tihmingthatute tihphurna leh Sawrkarin kan chawimawi let ve theihna a ni a. Chu mai bakah infiamna lamtluang zawh mek, Mizo thalai, hmabak eng tak neite tana chona petu leh fuihtu a nih beiseia siam a ni a.

Mizoram sawrkar chuan Mizo thalai infiammite tana hmabak eng leh chhenfakawm tak siam kawngah he dan hi sul sutu pawimawh tak a nih zel a beisei tlat a ni.