Itanagar, dated 19^th November 2025: November ni 8-24, 2025 chhunga Yonex-Sunrise 48th Inter State - Inter Zonal & National Junior Badminton Championship 2025 neih mekah Mizoram Boy's team te chuan FINAL-ah Delhi 2-1 a hneh in an champion.

Semi final-ah Chhattisgarh nen intum in, 2-1 in an lo chak tawh bawk a ni.

Final ah hian Mizoram team tan first singles ah H. Lalthazuala lut in, a tum pui Vansh Dev chu 21-15, 21-19 in a hneh a, doubles ah C. Lalramsanga leh Sainunmawia Sailo te lut in, Param Chaudhary leh Bhavya Chhabra te lakah 17-21, 22-24 in an chak lo. Reverse singles khelh a ngai a. Mizoram tan C. Lalramsanga lut leh in, Delhi lam tan Manthan Bobal a lut thung. 21-10, 11-21, 21-15 in Ramsanga a chak a, an champion ta a ni.

Hei hi Mizoram Badminton Team in National Level Team inelna a Gold medal a lak vawikhat na a ni a. 

Mizoram Boy's Team: 

1. H. Lalthazuala, Chanmari West, Chanmari Shuttlers Club

2. C. Lalramsanga, Durtlang, Mission Veng Badminton Club

3. Sainunmawia Sailo, Ramhlun Venglai, Sihphir Badminton Club 

4. Malsawmhlua, Serchhip P&E Veng, New Serchhip Badminton Club 

5. Vanlalmalsawmzuala, Serchhip, New Serchhip Badminton Club 

6. Vanlalpekhlua Sailo, Serchhip, Chaltlang Badminton Club 

7. Vanlalhruaia Sailo, Serchhip, Chaltlang Badminton Club 

Manager: Dr. Malsawmkima, Mission Veng 

Coach: Lalhlimpuia, Mission Veng

________________________________________________________________________________________________________________________________

He thil thleng chhinchhiah tlak bikah hian Mizoram Badminton Association chuan hetiang hian lawmthu sawina an ti chhuak a ni -

Nakin a chhuan lo awm lehzel turte pawh in an hriatreng tawh tur ni ropui leh chhinchhiahthlak bik, Arunachal khawpui Itanagar a neih, Yonex-Sunrise 48th Inter State - Inter Zonal & National Junior Badminton Championship 2025-a Mizoram Junior Boy's team te'n Gold medal an la thei hi a ropui kan tiin kan va lawm tak em!

He hnehna hian court chhunga chakna ringawt piah lamah inpekna leh inhuamna a lantir a, Mizoram hian a sang ber kan thleng thei a ni tih a entir tel bawk. Kan nau ten tun dinhmun thleng tura kaihhruaina tha an dawn dân zawng zawng pawh kan theihnghilh thei lo.

Tun ang dinhmun kan din theih nana min thawhpui tute - Tata Trusts, NEIDA, PGBA leh MSSC te chungah lawmthu kan sawi tak meuh a. Anni inpekna leh hmathlir fing tak avangin Mizoram Badminton hi dinhmun sang takah kan din theih phah a ni. An puihna leh thahnem min ngaihpui na lo chuan tun dinhmun hi kan thleng thei lo tih kan hria.

Tin, Pi Neelam Babardesai, Head of Sports, Tata Trusts te, Pu Pullela Goichand, PGBA hotupa te, Pu Sajith John, Senior Sports Consultant, TATA Trusts leh NEIDA team member zawng zawng te chungah thinlung takin lawmthu kan sawi bawk. An bul tanna duhawm tak avangin Mizoram Badminton in hun rangkachak kan tawng chho mek kan ti thei ang. Heng bakah kan mamawh apiang kan thlenna, Pu Henry C. Lalrawnkima, Secretary, MSSC leh Mizoram Badminton Centre, Zuangtui min enkawl tirtu, Aizawl Smart City Limited CEO, Pu CC. Lalchhuangkima leh an thawhpui te chungah pawh kan lawm tak zet zet a ni. An thlazar hnuai ah hmalam pan in kan kal zel a, hmasawnna tharlam leh duhawm kan neih belh chho zel a ni si a.

He ni lawmawm bik ah hian MBA hruaitu hmasa leh sul lo su kaw tute kan hre reng a. Tih tak zet leh thahnem ngai in, anmahni pawisa seng in pawl an lo kaihruai tawh thin. Chung avanga tun hun hi thleng thei kan ni e.

Tin, Mizoram Badminton player lo ni tawh thin zawng zawngte chungah pawh lawmthu kan sawi a ni. Hmahruaitu an ni satliah lo a, theihna a awm zia tilang turin kawng an lo sial hmasa a, chuvang chuan tuna kan player naupang tak tak te pawh in phurna leh chona lian zawk an hmachhawn theih phah a ni.

Kan Junior Boy's team te hlawhtlinna avang hian Mizoram Badminton chhungkua chu a hlim a, a lawm tak zet a. Thawhhona tha, inlungrualna tha leh hlawhtling ngei tura tih hram hram tumna a awm phawt chuan hlawhtlinna kawl a eng mai zel a lo ni. Kan ban phak loh khawp a sang a awm thei lovang!

________________________________________________________________________________________________________________________________

Congrats Mizoram Junior Badminton Team! Congrats Mizoram Badminton Association!