Aizawl, the 14th of June, 2024: Ni hnih chhung awh infiamna lama India ram pum huap inrawnkhawmna leh zirhona, Mizoram Sports Conclave 2024 chu Baptist Centre, Falkland-a hlawhtling taka hman a nih hnuah vawiin khan khar a ni a. Conclave chhung hian kum 2036 Olympic Games-a Mizo infiammi tam thei ang ber tel theihna’na ke pen dan tur thlirhona hun hman a ni.
Mizoram Sawrkar, Department of Sports & Youth Services huaihawt Mizoram Sports Conclave hi Pu Lalduhoma, Chief Minister chuan nimin khan a hawng a, Vision Olympics 2036 chu sawrkar policy a telh tum a nih thu a sawi.
Conclave-ah hian Pu Shakliar Warjri, Meghalaya Sports Minister leh Pi Nandita Garlosa, Assam Sports Minister te lo kalin 2036 Olympic Games hmathlira nei chunga hmalak theihna kawng hrang hrang an sawi a. Anni bakah hian India rama infiamna lama sulhnu lian tak nei Reliance Foundation, Tata Trusts leh Jindal group atang te in an mithiamte leh mawhphurhna lian chelhtute an lo tel. Services Sports Control Board hotu te, India rama sports federation leh association hrang hrang hruaitu te, Indian Olympic Association hruaitute bakah ram chhung leh pawn atangin sports journalist leh infiammi langsar tak tak te an rawn kal a ni.
Mizoram Sports Conclave nihnihnaah hian kum 2036 Olympic Games thlir chunga hmasawn theihna tur thupui hrang hrang zirho a hun hman chhunzawm a ni a. Conclave hi session 7 (pasarih) ah then niin, Sawrkar hruaitu leh mithiam dangte thusawi ngaihthlak a nih bakah panel discussion hun leh zawhna leh chhanna hun te neih a ni a. Session hmasa berah Chief Minister Pu Lalduhoma chuan conclave hi a hawng a ni. Pu Lalnghinglova Hmar, Sports Minister in Olympic Games 2036 a Mizoram infiammi tam thei ang ber an tel theihna tura Sawrkar hma lak tum dan (plan) a sawifiah bawk.
Session hnihnaah Pu Shakliar Warjri, Meghalaya Sports Minister leh Pi Nandita Garlosa, Assam Sports Minister te’n thu sawiin, Olympics 2036 atana infiammite chherhriam tura hma an lak dan te an tarlang a. Mizorama tih ve theih dante sawihoin hun hlawkthlak tak hman a ni.
Session thumnaah Indian sports hmasawnna’na thawhhlawk tak tak - Reliance Foundation, Tata Trusts leh Jindal Group aiawhte’n infiammite hmasawnna kawnga private sector te tihtur (role) sawihona ngaihnawm leh bengvarthlak tak an chhawpchhuak a ni.
Session li naah chuan CMDE Varun Singh, Services Sports Control Board Secretary leh Grand Master Prof. Hee do Kim (Taekwondo Olympic Medalist, South Korea) te’n thu an sawi a. Infiammite hlawhtlinna’na chhungkua leh khawtlang in mawhphurhna a neih te, sports ecosystem nung leh daihrei nei tura pawimawh te tarlangin sawihona neih zui a ni bawk.
Session nga naah India rama sports association/federation hrang hrang - Indian Olympic Asociation, Indian Weightlifting Federation, Wrestling Federation of India, Boxing Federation of India, Table Tennis Federation of India hruaitute’n Olympian chherchhuak tura Sports federation te mawhphurhna bengvarthlak tak an sawiho a ni.
Session ruknaah Pi Monalisa Baruah Mehta, National Champion, Table Tennis leh Pu Mukul Choudhari, Chief of Sports, Tata Steel Ltd. te’n infiammite’n harsatna hrang hrang an tawh thin laia support system neih that a pawimawhzia bakah, Olympian chherchhuak tura chhungkua, sikul leh khawtlang pawimawhna te an tarlang.
Session hnuhnung berah Mizoram atanga Olympian kan neih pahnih - Pu C. Lalremsanga (Archery) leh Nl. Lalremsiami (Hockey) te pawhin an tawnhriatte atangin Mizoram hmasawnna tura an ngaihpawimawh an sawi bawk a ni.
Zirtawpni a Conclave tawpkharnaah hian Sports & Youth Services Minister Pu Lalnghinglova Hmar chuan Mizoram Sports Conclave 2024 hlawhtling taka hman a ni chu lawmawm a tih thu sawiin, Mizoram leh India rama infiammite hmasawnna kawngah rah tha a chhuah ngei beiseina sang tak a neih thu a sawi a. Conclave chhunga thu hrang hrangte zirhona piah lamah, sport association te leh mikhual lo kalte’n remchangah la a, inbiakna leh hmalak hona hun remchang atana hma an la chu lawmawm a tih thu a sawi bawk.
Minister chuan sawi chhunzawmin, Mizoram Sports Conclave hmalakna chuan kum 2036 Olympic Games-a Mizoram in infiammi a tam thei ang ber a tirh theih beiseiawmna tur infiamna (sports discipline) te thlurbing a nih tur thu a sawifiah.
Conclave tawp niah hian Assam Sports Minister bakah Mizoram sorkar-a Sports & Youth Services Secretary Pu Lalramsanga Sailo, IRS; Sports & Youth Services Department Director Pu Lalnunhlua leh Mizoram State Sports Council Secretary Pu John Tanpuia te an tel bawk a ni.
Photo Gallery etc. @ https://engage.mizoramsportsconclave.com
Attachment
Written by: Pratap Chhetri, MIS, Deputy Director
